مخلصتش تعليمي وآمال ماهر لو طلبت عيني أديهالها.. أبرز تصريحات شيرين عبد الوهاب لجمهورها
حرصت الفنانة شيرين عبد الوهاب على التفاعل مع متابعيها على مواقع التواصل الاجتماعي، من خلال إجابتها على بعض الأسئلة التي تلقتها عبر حسابها الشخصي بموقع انستجرام، وجهت من خلالها رسالة دعم للفنانة آمال ماهر، وكشفت أيضًا بعض الأمور الخاصة بحياتها الشخصية.
ونرصد أبرز تصريحات شيرين عبد الوهاب عبر انستجرام:
ـ موضوع أمال ماهر حساس لأنه خاص، بس أمال لو طلبت عيني أديهالها، إحنا إيه عرفنا أن في مشاكل؟.. أهلها قالوا أن مافيش مشاكل وأن أمال زي الفل ويارب تبقى زي الفل والنقابة كمان أكدت كلام أهلها أن مافيش مشاكل.
ـ أنا ست وأكيد بدعم المرأة في كل قضاياها، وده الكلام الي قولته مع الأستاذة إسعاد يونس، إن إحنا أقوياء وأني بدعم المرأة في كل قضاياها، ربك ما بيديش حلم تقيل غير للكتف اللي يشيل وإحنا ياما بنشيل.
تصريحات شيرين عبد الوهاب
ـ أنا وسعد لمجرد مش زعلانين خالص، أنا ببارك ليهم على الدويتو الجديد مبروك ليه ولإليسا.
ـ واقعة فتاة المنصورة، أنا نفسيًا الدكتور مانعني من متابعة أي أخبار سلبية، ومش بتابع أي أخبار كده أنا بعيدة تمامًا، لأني حساسة جدًا وبتأثر من الأخبار دي جدًا.. بس ربنا يصبر أهلها ويحتسبها في الجنة إن شاء الله.
ـ أكتر حاجة بحب أعملها مع بناتي أننا نقعد نرسم لوحة ونلونها مع بعض أو أي حاجة هانميد بنفرح بنتيجتها لما بتخلص.
ـ حق الله حسام عمرة ما أخد مني فلوس ولا استفاد مني ماديًا بل بالعكس تمامًا أنا ما عرفتش أحوش فلوس ليا غير لما أتجوزت حسام عشان كان بالعكس الي بيتقال تمامًا هو كان بيحافظ ليا على مالي ودي الصراحة، عشان هتسأل عنها قدام ربنا.
ـ حسام حبيب مرفعش عليا سلاح، إزاي يتقال كدة، وبردي دي شهادة هتسأل فيها قدام ربنا.
ـ بدأت الفن وأنا عندي 6 سنين.
ـ أبويا كان بيركبني خيل زمان، بس دلوقتي بخاف عشان ضهري، بس أنا عندي حصان اسمه بهي، عشان ولادي بياخدوا دروس فروسية ومريم متفوقة جدًا فيها.
ـ عاصي الحلاني ده أخويا الكبير وبيشيلني في عينه لما بنروةح لبنان وبنرح عنده كمان مزرعة الخيل، والحقيقة أنا ما عنديش خلاف مع أي زميلة أو زميل، كلهم حبايبي وأتمنالهم يكونوا أحسن مني.
ـ ندمت ساعات على عملي بالفن بسبب المشاكل اللي بيتجي من ورا الشهرة.
ـ أنا هدفي مالوش سقف ونفسي أوصل بعد العالمية، ونفسي أغني كل الألوان اللي ما غنتهاش قبل كده، وده تقريبًا سبب تأخيري عليكم، والدليل على كده أن أكبر معجبيني هيربيرد راجل فوق الـ 80 سنة، ومش بتكلم عربي بس حافظ كل أغانيه وبيجيلي كل حفلاتي وهو أصلا من سويسرا وميعرفش عربي.
ـ للأسف لسه مخلصتش دراسة في أكاديمية الفنون، عشان الدنيا أخدتني والشغل خدني، بس في أمثال كثيرة في الدنيا خلصوا دراستهم لما كبروا، وبالمناسبة ببارك لصديقي الشاعر والسيناريست أيمن بهجت قمر، أنه لسه مخلص دراسته ألف مبروك يا مجتهد.
ـ أحلام فنانة جميلة وأم عظيمة ربمات يخليها لأولادها وجوزها.
ـ كنت فاكرة أن مريم بنتي ولد، ولما عرفت استغربت جدًا، بس أنا بحمد ربنا على مريم وهنا، عشان اللي مخلفش بنات يبقى مخلفش.
ـ أتسألت قبل كده عن الانتحار من بنوتة وأنا جاوبت عليها بهزار، عشان ماتفهمش أنها لوحدها بتمر بظروف دي كلنا معرضين لده لكن أنا عايزة اطمن عليها وأقولها أن الافكار دي من وسواس الشيطان.
ـ الراجل نص الدنيا والدنيا راجل وست.
ـ والله العظيم معملتش تجميل في أنفي.
ـ مفيش أعظم من صوت بهاء سلطان.
ـ متعودة دايمًا أني بعتذر لأن الاعتذار من شيم الكبار وما فيش حد كبير على الاعتذار.
ـ أول حاجة بتشدني في الراجل شخصيته لما بتكون مميزة ويكون عاقل.
ـ أنا صحافة بلدي هي اللي علمتني وليها فضل كبير عليا وأنا افتخر بالصحافة بلدي
ـ عندي حفلة في تونس في 20 أغسطس أي فنان بيغني قدام جمهور تونس بيكبر بيهم.
