حمو بيكا عن منشوراته بعد استقالة هاني شاكر: كنت بعلن أغنيتي الجديدة.. سيبوني في حالي
نشر مطرب المهرجانات حمو بيكا، مقطع فيديو عبر حسابه الخاص بموقع فيس بوك، رد من خلاله على المنشورات التي كتبها بعد إعلان هاني شاكر استقالته من منصب نقيب الموسيقيين.
وقال حمو بيكا في الفيديو: أنا طالع أوضح معلومة لكل الناس اللي بتتكلم على السوشيال ميديا وبياخدوا كلام مش على لساني.. قبل ما أتكلم أستاذ هاني شاكر مقامه كبير على دماغي وبحبه ومفيش بيني وبينه أي حاجة وكنت زعلان إنه قدم استقالته وأنا اه مش شغال في مصر ومش زعلان ومش معايا كارنيه نقابة ومش بطبل ولا عايز أي حاجة.
سيبوني في حالي
وأضاف: بقول إن أستاذ هاني شاكر ده أخويا الكبير وبنتشرف بيه في كل حتة.. أنا نزلت صورة مكتوب عليها أنا راجع يا شوية جواجع ده تراك مع نور التوت.. والمهرجان بكرة هينزل لكن أنتم حرفتوا المعنى والدنيا اتقلبت اهدوا على نفسكم مش كل حاجة تاخدوها تحرفوها وتعملوا منها فيلم.
هدوا اللعب شوية
وتابع: هدوا اللعب شوية علشان مش مستحمل والله العظيم تلاتة كل واحد فيه اللي مكفيه أنا موقوف ومش معايا الكارنيه ومش معايا أي حاجة لكن راضي بحكمة ربنا وألف شكر ليك يارب إني ماشي على رجلي.
واستكمل: أستاذ هاني شاكر أنا أخوك الصغير وبحبك ومفيش بيني وبينك أي حاجة وقدرني ابنك مش عاوز حاجة ومش عاوز النقابة.. أنا طالع أوجه الرسالة للي واخدين الصورة دي أنا محدش له دعوة بيا وبعلن عن أغنية ليا يعني واحد بيعلن عن أغنية بتاخدوا الكلام تحروفوه.
هو مفيش غيري
وأردف: هو مفيش غيري سايبين الدنيا كلها ومركزين معايا سيبوني في حالي والله العظيم تلاتة ما أوعى أروح لأهلي ما قصدي على هاني شاكر.. أنا راجل في حالي وبعلن عن أغنيتي.. سيبوا الملك للمالك، وسيبوا كل واحد في حاله ليه بتحبوا تمسكوا في الخراب ركز في شغلك وحياتك ما توصولش سيرتنا للعرب بصورة وحشة ما توصولش أننا وحشين ليه بتوصلوا للناس أننا صيع ومالناش أهل، كل واحد عاوز يكتب حاجة يكتب على بقي، مش علشان تطلع تريند تتكلم عني.. وحسبي الله ونعم الوكيل في كل واحد بيجيب في سيرتي وكل واحد وحش.
