طلاب تربية حلوان ينظمون ممرًا شرفيًا لأستاذ الفيزياء.. والدكتور: ده كرم أخلاق منهم | فيديو
حرص طلاب الفرقة الثالثة بكلية التربية في جامعة حلوان على تقديم الشكر للدكتور أحمد عبد القادر، الشهير بالدكتور كيتا، أستاذ الفيزياء النظرية بكلية العلوم بالجامعة، من خلال تنظيم ممر شرفي له في آخر يوم بامتحانات العام الحالي.
تنظيم ممر شرفي لدكتور جامعي
يروي كيتا لـ القاهرة 24 كواليس الممر الشرفي له، قائلا: الطلاب كلموني وقالوا لي ممكن نتصور معاك علشان آخر يوم، والعادة إن آخر يوم الطلبة بتتصور مع الدكاترة بتوعهم، فقولتلهم ماشي وروحت لقيت المفاجأة دي.
وأضاف عبد القادر: الطلاب حبوا يردوا الجميل لأنى مكنتش بسيب حد إلا لما أفهمه الفيزياء، وبشرح بطرق كتير وبكون صابر معاهم لحد لما يفهموا، فهما حسوا إني بحبهم وكأنى أخوهم، وبما إني حبيتهم هما كمان حبوني.
رد الإحسان بالإحسان
ده كرم أخلاق منهم، إنهم قابلوا الإحسان بإحسان.. هكذا رد كيتا على تكريم الطلاب له، مؤكدًا أنه لم يكن متوقعا حدوث ذلك، حيث وصفها بـ صدمة حلوة.
وتابع: الطلاب حبوا يقولوا شكرا، وكل واحد عبر عن الحب بطريقته، وأنا كنت محرج بصراحة، ومكنتش مصدق إنهم ممكن يعملوا حاجة كدة وخصوصا معايا، لأن في دكاترة كتير، إن لم يكن كلهم أفضل مني علما وخلقا.
أفضل دكتور في الجامعة.. هكذا علق الطلاب على فيديو الممر الشرفي لأستاذ الفيزياء، وسط دعوات له بالبركة، لأنه لم يبخل عليهم بأي معلومة طوال العام.
