ميدو يهاجم رواتب اللاعبين في مصر: فلوس الأندية ملك الشعب.. كفاية بذخ
هاجم أحمد حسام ميدو، نجم الكرة المصرية السابق، مسؤولي الأندية الذين يدفعون رواتب ضخمة للاعبين، رغم إمكانياتهم المحدودة.
وقال ميدو في تصريحات تلفزيونية: اللاعب بيبقى واخد في نادي مليون جنيه، فجأة بياخد في مصر 17 أو 18 مليون، الطفرة دي هتخليه يجيله هزة وخبل مهما كان اسمه هزة تساهم في تراجع مستواه.
وأضاف أحمد حسام ميدو: فلوس الأندية اللي مش خاصة الفلوس دي ملك الشعب، لازم جزء من الميزانية يتم تخصيصه لتطوير الناشئين وتطوير اللاعبين، والتطوير مش كلمة وخلاص، لازم يكون في حلول على أرض الواقع.
تصريحات أحمد حسام ميدو
وتابع نجم الكرة المصرية السابق: في مشكلة في تقييم اللاعيبة في مصر، ومبقاش عندنا لاعيبة كافية في مستويات عالية.
وناشد أحمد حسام ميدو بضرورة وضع سقف خاص لرواتب اللاعبين في مصر، موجها طلبا خاصا من مسؤولي الأندية ورابطة الأندية.
وأردف ميدو: لابد من وجود سقف خاص لرواتب اللاعبين في مصر، وأطالب رابطة الأندية بوضع قوانين خاصة بذلك.
وأكمل نجم الزمالك السابق: هل يرضي ربنا في لاعيبة محترفين بتاخد مليون ونص دولار وبعد ما يسيب مصر ياخد 200 ألف يورو.
وواصل ميدو: أجوجو كان لاعب بيلعب درجة تالتة في إنجلترا كان بيتقاضى 4000 إسترليني في الأسبوع ونادي الزمالك جابه اداله مليون دولار، لو الأندية بتاعتنا أندية خاصة وبتطلع من جيب المسؤولين، هل كنتوا هتدفعوا الفلوس دي بالبذخ ده، في جزء كبير من اللاعيبة المصريين ميستحقوش الأرقام اللي بتدفع فيهم.
وقال ميدو: رود كرول من أفضل الناس اللي اشتغلت في مصر، راح يلف المحافظات يدور على المواهب ومنهم أحمد حسن وعلي ماهر وحازم إمام وابتدا يعمل للاعيبة دي معسكرات في المركز الأولمبي في المعادي وكانوا عايشين هناك، وطلع منهم 10 لاعيبة جامدين مثلوا منتخب مصر 10 سنين.
واختتم حديثه قائلا: تطوير الكورة في مصر لازم يجي من التطوير، ورسالتي الإعلامية بتخليني لازم أقول الكلام ده.
