مصطفى عباس: أقعد في البيت على أمجادي أحسن من إني أشتغل في عمل ميتشافش
تحدث الفنان مصطفى عباس، عن سبب عدم تواجده بصفة مستمرة، سواء السينما أو الدراما، موضحًا أنه يختار دائمًا أدواره بـ عناية شديدة، حتى لا يندم على عمل يقدمه فيما بعد.
وقال مصطفى عباس، في تصريحاته لـ القاهرة 24: أنا من بدايتي اشتغلت مع ناس كبار وعمالقة، دايمًا بختار الشغل مش أي حاجة وخلاص، أنا بيتعرض عليا شغل بس مش ده اللي الناس مستنياه ولا ده حلمي، مش عايز أطلع وخلاص، بحب دايمًا شغلي يكون مميز حتى لو مشهد في فيلم أو مسلسل، بس يبقى باين ويعلم مع الناس، أنا مبعرفش أعمل علاقات علشان أشتغل، ولا إني أدني من نفسي عشان أشتغل، وعمري ما طلبت من حد أنه يرشحني في عمل، لو أنتوا مش شايفني غيابي ده أنتوا السبب فيه.
وتابع مصطفى عباس: أنا مش بمثل أي دور وخلاص، أهم حاجة إن الدور يكون هادف ومحترم والفنانين محترمين ويتشاف، يعني أنا السنة اللي فاتت عملت دور زيتونة في مسلسل بابلو، والسنة اللي قبلها كنت في مسلسل كوفيد 25، بعمل شغل الناس تشوفه، إنما مش أي مسلسل يتعمل مفيش حد يشوفه طب أنا بعمل إيه وبتعب ليه على الفاضي؟ مش هنزل من بيتي عشان أخد فلوس وخلاص، أنا في جوايا هدف ورسالة عايزها توصل للناس، وهتوصلهم عن طريق أنهم يشوفوني.
وأضاف مصطفى عباس: أنا أقعد في البيت على أمجادي، وعلى سيرة الناس اللي أنا اشتغلت وتحاورت معاهم، دي عندي هتبقى أحسن من إني أشتغل في عمل تعبان ميتشافش.
واستطرد مصطفى عباس: أنا حاسس من ربنا سبحانه وتعالى وواثق إنه ربنا كاتب لكل واحد وقت هينتشر فيه وياخد حقه، زي الأستاذ خالد الصاوي، وخالد صالح الله يرحمه، وزي نجوم كتير كبيرة مقامًا وليس سنًا، وأنا الحمد لله محبوب جدًا في الشارع، وناس كتير جدًا مستنين إني أشيل فيلم أو مسلسل، بس الموضوع محتاج منتج يجازف ويقول أنا عايز مصطفى كفاية عليه كده ولازم يظهر، لسه المنتج أو المخرج ده ربنا مبعتهوش.
