محمد التاجي: بعض الشخصيات العامة بيحرفوا الدين.. وهناك صحفي عامل برنامج لهدم المجتمع
أبدى الفنان محمد التاجي ، رأيه في الأفلام التي بها مشاهد عنف وتأثيرها على المجتمع، مؤكدًا أن الفن بريء من هذه الاتهامات ولا ينشر العنف بل هناك العديد من العوامل التي تؤدي لانتشار الجرائم، بجانب الحديث عن دور رجال الدين.
وقال محمد التاجي في تصريح لـ القاهرة 24: الفن بريء من اتهامات التحريض على العنف، وفيه أسباب تانية كتير ولكن الناس ماسكة في الفن وفيلم عبده موته اللي بقاله 10 سنين، ولكن لازم نفهم أن الجرائم موجودة في المجتمع من قبل عبدة موته، ومن أسباب تفكيك المجتمع والأسرة هم بعض الشخصيات العامة اللي بيتكلموا في الدين وهم لا ينتمون لأي مؤسسة دينية.
وواصل التاجي: الناس دول بيحرفوا الدين لمصالحهم وهدفهم هدم المجتمع والأسرة، وشوفنا شخص طلع قال الحجاب مش فرض مع أن بناته محجبين.. يبقى إزاي؟ وأنا شخصيًا شايف كل شخص حر ولكن كلامه متناقض ويدل أنه بيحاول يوصل لهدف محدد، وهما مش رجال دين ومش مهنتهم وواحد منهم دكتور والتاني صحفي وبيطلع كل يوم في برنامجه يتكلم في الدين.. وهما دول اللي بيبعدوا الناس عن الدين.
واختتم محمد التاجي حديثه مؤكدا على احترامه لجميع المؤسسات الدينية مثل الأزهر ودار الإفتاء، قائلًا: أنا بحترم جميع المؤسسات الدينية وبلجأ لهم في جميع المواقف وبحب الشيخ علي جمعة ورجال الدين لهم دور مهم في المجتمع، ولكن أي حد غيرهم غير متخصص وبيتكلم في الدين مش بسمعله ولا بحترمه.
