عايدة رياض ترد على منتقدي احتفالها بعيد الأضحى: محدش كان بيسأل عن ديانة حد
تحدثت الفنانة عايدة رياض عن طقوسها في عيد الأضحى، وكيف تحتفل مع أصدقائها المسلمين، مؤكدة أنه لا يوجد فرق بين المسيحي والمسلم في مصر.
وكتبت عايدة رياض على حسابها بـ انستجرام: مسيحية وبحتفل بعيد الأضحى، أنا مش شايفة أن الموضوع كان مستاهل كل الضجة دي إطلاقًا.. كوني مسيحية وبشارك في الاضاحي وباكل فتة وبنعيش أجواء العيد مع بعض ودي حاجة مش بتقلل مني أول حتى بتثير الجدل بالعكس ده شيئ محمود جدا.
واستكملت عايدة رياض: الذبح عموما موجود في كل الأديان السماوية وموجود في ديانتنا وبنشترك كلنا وبنضحي وبنتجمع كالعادة وخلي اللي يتكلم يتكلم وأنا متعودة على كدا من زمان، وعمر ما حد كان بيسأل على ديانة حد.. الدين لله والوطن للجميع وكلنا في الأخر مصريين إخوات وأهل وصحاب وأحبة ومفيش فرق بينا إطلاقا.. ولما حد كان بيتكلم كلمة مش كويسة عن الإسلام كنت بطلع أرد بنفسي لأننا واحد يا جماعة مفيش فرق بينا.
وأضافت عايدة رياض: نتشارك والوطن اللي بيجمعنا على المحبة والود وطول عمرنا إيد واحدة وهنفضل إيد واحدة ويقول غير كدا دول ناس فاضية وأنا مش عايزة أدخل في جدل مع حد من دول، يا رب دايما متجمعين في الخير ودايما إخوات وأهل وصحاب وجيران وحبايب ودايما إيد واحدة وربنا يخلينا لبعض.
