بعد دخوله عالم البيزنس.. محمد نجاتي يوجه رسالة للشباب: إبدأ بـ حاجة صغيرة هتكبر معاك
احتفل الفنان محمد نجاتي، أمس الخميس، بـ افتتاح أول مطعم وكافيه خاص به في مدينة العلمين الجديد،معربًا عن سعادته بدخوله عالم البيزنس متمنيًا النجاح.
وقال الفنان محمد نجاتي، لـ كاميرا القاهرة 24، أثناء تغطية الاحتفال، إن فكرة هذا المشروع جاءت بدعم وتشجيع كبير من أصدقائه، قائلًا: أصدقائي الفنانيين كتير جدًا، وفتحوا المشروع ده من قبلي ولقيت نجاح، وهما شجعوني كتير إن أنا أعمل كده بس الأول كنت بكسل يعني مكنتش لسة شايف نفسي في الموضوع ده، وواحدة واحدة اتشجعت.
وتابع محمد نجاتي: وعلى فكرة أنا مش لوحدي، أنا معايا رجل أعمال، وهو اللي شجعني إننا نفتح الكافيه مع بعض، وإحنا فرحانين أوي بفرحة الناس بينا وإن شاء الله النجاح لينا ولكل الناس.
كما حرص الفنان محمد نجاتي، على توجيه رسالة للشباب، قائلًا: بقول للشباب متغلطوش غلطتي، أنا في الأول كنت بعيد عن موضوع البيزنس ده وكنت متفرغ تمامًا لموضوع التمثيل والسينما والدراما، بقول لكل شاب إتخرج الأول من الجامعة وأعمل أي مشروع وإبدأ بـ حاجة صغيرة هتكبر معاك طول ما أنت حاطط فيها ضميرك مؤمن بيها.
وأضاف محمد نجاتي: إبدأ بـ أي حاجة، دلوقتي المشاريع اللي زي دي بتبقى جمعية، مجموعة أصحاب كل واحد لو حط فيه رقم هيبقى حاجة كبيرة فمش لازم أنت بس تستنى يبقى معاك مبلغ علشان تقول أنا هفتح كافيه لوحدي، أو هعمل عمارة لوحدي، أنت مش هتقدر تبني عمارة لوحدك، أنت لو فتحت بقالة بعد 5 سنين هيبقى عندك هايبر كبير، مفيش حد بيتعب في حاجة إلا لما بيوصلها.
كما وجه الفنان محمد نجاتي، نصيحة إلى المستثمرين والعرب بضرورة استثمار أموالهم بمشارع بمصر خاصة بالمدن الجديدة في العاصمة الإدارة او مدينة العلمين الجديدة، خاصة في ظل الدعم الكبير الذي تقدمه الحكومة المصرية في الوقت الحالي للاستثمار، قائلا: أنصح أي شخص مصري أو عربي بالاستثمار في العاصمة الإدارية والعلمين الجديدة.. العلمين الجديدة مدينة متكاملة تحتوي على جامعات وجميع الخدمات.
