فرح الزاهد عن واقعة التحرش بشقيقتها نور: المتهم خرج من الحبس لأن الإنسانية ساعات بتحكم
تحدثت الفنانة فرح الزاهد شقيقة هنا الزاهد، عن واقعة التحرش بشقيقتها الصغرى البلوجر نور، خلال وجودها بالقرب من أحد المراكز التجارية، ما دفعها للاتصال بالشرطة، وذلك بعدما أخلت جهات التحقيق بأكتوبر سبيل المتهم بالتحرش، داخل مول تجاري شهير في مدينة 6 أكتوبر.
وقالت فرح الزاهد لـ القاهرة 24: المتحرش خرج من الحبس عشان عنده أولاد، ورد الفعل كان على قد الفعل أكيد مستقبل ولاده مش هيدمر ويتحبس 3 سنين علشان كلمة القانون موجود.. ولكن الإنسانية ساعات بتحكم وهو خد جزائه.
وأضافت: أنا بنصح كل البنات أنها ما تسكتش عن حقها لو اتعرضت للتحرش حتى لو بلفظ، أنا بجيب حقي دايما ومرة واحد في أوتيل كان بيعاكسني وقال لفظ عملت له محضر وجبت له شرطة السياحة.
وكانت فرح الزاهد، كشفت تعرض شقيقتها الصغرى نور للتحرش خلال وجودها بالقرب من أحد المراكز التجارية، ونشرت صورة للشخص الذي تتهمه بالتحرش، معلقة: طيب دلوقتي الراجل ده متحرش واقف في مول مصر عمال يتحرش بالبنات وحاجة في منتهى قلة الأدب!.. مرحمش حتى أختي الصغيرة من المعاكسات والكلام الزبالة وعمال يغمزلها وحاجة تخدش حياء أي بنت.
وأضافت فرحعبر ستوري حسابها الخاص بموقع انستجرام: وهي واقفة عند البنك هي ووالدتي فزعقوا فيه يروح مبجح فيهم ويقل أدبه ويقول أنا معملتش حاجة ومجتش جمبها، والناس حواليه عادي جدا، مفيش راجل واحد بس عايز يتكلم! طلبنا النجدة، ويا رب يكون في استجابة سريعة عشان نقضي على الأشكال دي.
