مدرس جيولوجيا يرفض 280 ألف جنيه لمراجعة ليلة امتحان الثانوية العامة بالأقصر
في واقعة أثارت اهتماما كبيرا، رفض مدرس لمادة الجيولوجيا والعلوم البيئية، إعطاء محاضرتين للمادة في قاعة المؤتمرات الدولية بمدينة الأقصر وسط حضور 1400 طالب، على أن يدفع الطالب 100 جنيه في كل محاضرة ليصبح إجمالي المبلغ 280 ألف جنيه، حيث من المقرر أن يؤدي طلاب الثانوية العامة 2022 الامتحان في المادة صباح غدٍ.
حكاية مدرس جيولوجيا رفض أكثر من ربع مليون جنيه في محاضرتين
وكتب الدكتور حسن سلطان، أشهر مدرس جيولوجيا بمحافظة الأقصر عبر صفحته الشخصية على موقع التواصل الاجتماعي فيسبوك: نظرا لكثرة الرسائل والمكالمات والبوستات التى تأتينى من الطلاب يسألوننى انت ليه يا مستر ما عملتلناش حصص مراجعة ليلة الامتحان وفاكرين إنه تقصير منى أود توضيح، لقد تواصلت معى احدى المؤسسات الخاصة قالت لى الطلاب عاوزينك تعملهم مراجعات فى قاعة المؤتمرات وان تلك المؤسسة هى من ستتولى التنظيم وكان اقتراحهم تحصيل 100 جنية المحاضرة
3 ساعات متواصلة عدد الحضور هيكون أكثر من 1400 طالب يعنى سأحصل مبلغ 140 ألف جنيه في يوم واحد وكانت هتبقى محاضرتين اضرب × 2 يعنى 280 ألف جنية يعنى ربع مليون انت متخيل الرقم ده؟.
سبب رفض إعطاء محاضرتين لطلاب الثانوية العامة
وتابع: لكننى رفضت رغم إلحاحهم الشديد لأنى شايف إن الجيولوجيا ظلمت في الجدول بيومين فقط والمطلوب من الطالب مذاكرة 7 أبواب، فالوقت لا يسمح بخروج الطالب ويركب مواصلات وينتظر المستر النينجا ليڤيل الوحش اللى هيتوقعله امتحان بكره، وانا بفضل الله اعطيتكم كل الأفكار اللي تخليك بإذن الله تحل الامتحان مهما كان مستواه.
أنت إنسان غريب
واستكمل: يعنى خلاصة القول علشان ما تفتكروش انه تقصير منى يعلم الله اننى رفضت تلك المبالغ فى سبيل مصلحتكم ومصلحتكم وفقط لدرجة إن تلك المؤسسة دهشت لرفضي وانا فاكر الجملة اللى قالهالى الدكتور التابع لتلك المؤسسة، حضرتك إنسان غريب وأنا عارف قصده إني إنسان عبيط بس هو محترم بزيادة والله على ما أقول شهيد.
حسن سلطان جيولوجيا
واختتم الدكتور حسن سلطان أشهر مدرس جيولوجيا في الأقصر: أنا فاتح الواتس بأجاوبك على أي سؤال محتاجه، يلا يا أبطال باذن الله بكره رايحين نجيب الـ60 يارب وفقهم واجعل في كل بيت فرحة غامرة يوم النتيجة تنسيهم تعبهم ومعاناتهم.
امتحانات الثانوية العامة
يذكر طلاب الثانوية العامة 2022 كانوا أدوا الخميس الماضي، امتحاني مادتي الفيزياء لقسم العلمي والتاريخ لقسم الأدبي.
ومن المقرر أن يؤدي طلاب شعبة العلمي علوم صباح غد الأحد امتحان مادة الجيولوجيا، وطلاب الشعبة الأدبية امتحانات علم النفس والاجتماع، وطلاب شعبة العلوم الرياضية امتحانات الرياضيات البحتة التفاضل والتكامل.
