بدرية طلبة لـ ستات البيوت: استروا نفسكم.. إحنا بنلبس براحتنا في البيت لكن مش هنطلع كده للناس
عبرت الفنانة بدرية طلبة عن استنكارها الشديد من بعض السيدات اللاتي ينشرن مقاطع فيديو، تحت عنوان "روتيني اليومي"، عبر مواقع التواصل الاجتماعي، قاصدات تحقيق مشاهدات عالية من خلال تقديم محتوى مسيء من خلال تعمد ارتداء ملابس مكشوفة وتقديم محتوى غير هادف.
وقالت بدرية طلبة لـ القاهرة 24: دول مش ستات بيوت دول مسخرة، حاجة صعبة وعيب، أنا أعمل الروتين اللي يعجبني في بيتي ما طلعش أوري روتيني لحد ساعات بنشتغل في بيتنا واحنا لابسين براحتنا لكن مش هنطلع كده قدام الناس، ومعظم التعليقات بتشتمهم ومع ذلك بتعليهم.
ووجهت بدرية طلبة رسالة إلى سيدات البيوت قائلة: استري نفسك لو بتعلِّمي الناس صح مش هتحتاجي تعملي حاجة تانية وتوريهم جسمك.
ونشرت بدرية طلبة أمس، مقطع فيديو عبر حسابها بموقع انستجرام قالت فيه: في كام واحدة على تيك توك بتقول تعالي أعلمك الروتين اليومي في بيتي، روتين إيه يا موكوسة، إنت بتعلمي الستات إيه!، روتين إيه وإنت كل شقتك قوضة أو قوضتين وصالة، أومال لو 10 قوض كل يوم تمسكي قوضة تعلميهم فيها".
واستكملت: عاوزة أعرف إيه لازمة الجلابية المحزقة والملزقة عليكي، الشفافة دي عارفاها، روتينك في بروتينك.
كانت بدرية طلبة تصدرت محركات البحث، بعدما فاجأت جمهورها بارتداء فستان أبيض، وظهرت بلوك جديد بدت خلاله بعمر أصغر وتغير واضح في ملامحها، وقالت لـ القاهرة 24 إنها كانت تتمنى ارتداء فستان زفاف إذ لم ترتديه يوم زواجها موضحة: يوم حفل زفافي كنت أصور مسرحية ولم أستطع تأجيلها، وكذلك لم أستطع تأجيل حفل الزفاف فحضرت حفل زفافي بعد انتهاء التصوير بنفس ملابس الشخصية التي كنت أجسدها إذ كنت أرتدي جلابية ستان وأكملت اللوك بتسريحة شعر وميكب وفضلت شغلي على ارتداء فستان زفاف.
