ضربني وسحلني.. شيرين عبد الوهاب تكشف حقائق صادمة عن ممارسات حسام حبيب معها
كشفت الفنانة شريين عبد الوهاب حقائق صادمة عن حياتها مع طليقها حسام حبيب، قائلة: مارس معي كل أشكال الابتزاز مش عازوني أعمل أي حاجة في حياتي، غير أبقى قاعدة قدامه بس.
تصريحات شيرين عبد الوهاب عن حسام حبيب
وأضافت، خلال مداخلة هاتفية: لو روحت عملت حفلة أو فرح ناجح ينكد عليا ويقولي كنتي ماكسة الراجل كده ليه والواد بيعمل معاكي كده ليه؟ أقوله ده قد ابني ولو عملت إعلان ناجح زي إعلان بنك مصر، وأبقى تريند والناس مبسوطة بيا، لازم ينكد عليا، ويبوظ اليوم.
وتابعت: تم طلاقنا بعد حلق رأسي وكان طلاق بائن، وبعد أن هدأت من الكارثة، شعرت أني لا أستطيع الاستغناء عنه ولازم أديله فرصة تانية، وإن مينفعش نبعد عن بعض بفجر في الخصومة، وكنت مؤمنة أن العلاقة مقدسة، وكنت بحبه وفاكراه ابني مش جوزي، وعملتله استوديو لشغلنا، وقمت بشراء كل الأغاني التي أعجبته بشيكات باسمي عشان متروحش منه.
شيرين: تعرضت للتنمر من حسام حبيب
وكشفت المطربة تعرضها للتنمر من حسام حبيب، قائلة: بعد ما عمل كل ده ألاقيه بيتهمني ويتنمر عليا، ويقولي تخنتي وبقيتي شبه أمك، وأنا عاوز واحدة أتباهى بيها قدام الناس تبقى حلوة ورفيعة وكلام من ده، بخلاف الخناقات التي تعرضت فيها للضرب والسحل على الأرض وشتيمة، عمر ما في إنسانة تقلبها على نفسها.
واصلت الفنانة حديثها قائلة: لما تم طلاقي رجعت له وأديته فرصة أخرى بشروط، وأن يكون مختلف عن بيت الزوجية، وألا يتعرض البنات لحالة نفسية سيئة، وكان بيتردد على بيتي عشان فيه استوديو تحت البيت وقتها وبينا شغل، وحاولت أهيأ البنات إنه لا زال موجود لحد ما تلاشت الوعود مجددًا، ورجعت المشاكل وقلة الأدب ترجع بلا سبب.
شيرين: عندي مشكلة أني لما بتعصب
واستطردت: أنا عندي مشكلة أني لما بتعصب بوصل لليفل صعب ممكن أذي نفسي، ودكتوري اسمه محمود مرسي ممكن تكلموه تسألوه، ونصحه بتركي لفترة حتى ولو ربع ساعة أو أني أدخل أوضتي شوية لحد ما أهدى، لكن هو أصر في كل خناقة يفضل قدامي يحرق في دمي وأعصابي لحد ما أمسك الماكنة وأحلق شعري.
وردًا على سؤال: كان عايز يوصل لإيه في الآخر؟، قالت شيرين: أنا كنت فوق ولا زلت وهو كان تحت، ولما معرفش يطلعلي فوق حاول ينزلني تحت.. وده تحليلي لكل اللي حصل.
شيرين: آسفة على اللي عملته في نفسي وبناتي وجمهوري
وأضافت: آسفة على اللي عملته في نفسي وبناتي وجمهوري اللي كان مقتنع أني مش على ما يرام، وكنت بطلع أقول كلام غير الحقيقة، كاشفة أنها اتجهت للغناء عندما كانت حليقة الرأس، حتى لا تصاب بناتها بعُقدة، قائلة: طلعت غنيت عشان بناتي ميتعقدوش لأني كنت قرعة.
