محمد نجاتي: رفضت ألبس بدلة رقص بمزاج الخير.. ومعرفش أمثل دور ست
كشف الفنان محمد نجاتي كواليس أحد مشاهده في مسلسل مزاج الخير مع الفنان الراحل حسن حسني، ومصطفى شعبان.
وقال محمد نجاتي خلال لقائه مع القاهرة 24، إنه اعترض على مشهد ارتداء بدلة رقص في أحد مشاهد المسلسل، مشيرًا إلى أن المشهد لم يكن مكتوبًا في السيناريو ولكن الراحل حسن حسني هو من اقترحه.
وتابع نجاتي: كنت معترضًا على المشهد في البداية، وهو ما كانش مكتوب في الورق اللي اخترعه حسن حسني، ولبست بدلة رقص وأنا مضايق جدًا.. وأنا مش بعرف أمثل دور واحدة ست مع أن في نجوم كبار عملوها وأتقنوها لكن أنا مش بعرف وكنت مضايق في المشهد ده لكن هو دراميًا كان جيد.
من ناحية أخرى، احتفل نجاتي، مؤخرًا بـافتتاح أول مطعم وكافيه خاص به في مدينة العلمين الجديد، وقال لـكاميرا القاهرة 24، أثناء تغطية الاحتفال، إن فكرة هذا المشروع جاءت بدعم وتشجيع كبير من أصدقائه.
ووجه محمد نجاتي، رسالة للشباب، قائلًا: بقول للشباب ما تغلطوش غلطتي، أنا في الأول كنت بعيد عن موضوع البيزنس ده وكنت متفرغ تمامًا لموضوع التمثيل والسينما والدراما، بقول لكل شاب أتخرج الأول من الجامعة وأعمل أي مشروع وأبدأ بـحاجة صغيرة هتكبر معاك طول ما أنت حاطط فيها ضميرك مؤمن بيها، مش لازم أنت بس تستنى يبقى معاك مبلغ علشان تقول أنا هفتح كافيه لوحدي، أو هعمل عمارة لوحدي، أنت مش هتقدر تبني عمارة لوحدك، أنت لو فتحت بقالة بعد 5 سنين هيبقى عندك هايبر كبير، مفيش حد بيتعب في حاجة إلا لما بيوصلها.
