نهاد أبو القمصان: فين البنت الجدعة بتاعت القلعة؟.. انتي مش لوحدك وستات كثير زيك
وجهت نهاد أبو القمصان، المحامية، وعضو المجلس القومي لحقوق الإنسان، رسالة للفنانة شيرين عبد الوهاب، بعد تصريحاتها الأخيرة حول زوجها السابق حسام حبيب.
أزمة شيرين عبد الوهاب وحسام حبيب
وقالت نهاد: إيه يا شيرين إيه اللي حصل المرة دي، مدهولة كدا ليه، اللي بيحصل معاكي زيك زي أي ست مصرية، تجربتك دي شوفناها بدل المرة ألف مرة، تجربتك اتهرست في مليون فيلم عربي قديم، الستات المصرية بالتحديد في الجوازة التانية بيحصلها حاجات كتير أولها بتحاول الست دائما في الإصلاح.
شيرين عبد الوهاب وحسام حبيب
كما أضافت: بتفضلي تضغطي علي نفسك عشان خايفة تتطلقي مرتين، لا اطلقي مرة واتنين وثلاثة وعشرين طول ما إنتي مش مرتاحة، مفهوم الست الأصيلة كلمة بقت شبهة الست الأصيلة تستحمل اه بس الراجل اللي عنده ظروف صعبة وخارج إرادته بنت الأصول هي اللي تعرف تلزم اللي قدامها يقولها يا هانم.
وتابعت اللي يوصل إنه يشتم مراته إذا مش هيكون في إصلاح زمان في الفلاحين اللي كان يشتم مراته كان يتعمله قاعدة ويتمسح بيه البلاط قدام أهله ويتقاله لو عملتها تاني هتتعلق عشان أنت كدا مش راجل، دلوقتي مش بيحصل كدا إذا الحل اللجوء للقانون.
وكانت كشفت الفنانة شريين عبد الوهاب حقائق صادمة عن حياتها مع طليقها حسام حبيب، قائلة: مارس معي كل أشكال الابتزاز مش عازوني أعمل أي حاجة في حياتي، غير أبقى قاعدة قدامه بس.
تصريحات شيرين عبد الوهاب عن حسام حبيب
وأضافت، خلال مداخلة هاتفية: لو روحت عملت حفلة أو فرح ناجح ينكد عليا ويقولي كنتي ماسكة الراجل كده ليه والواد بيعمل معاكي كده ليه؟ أقوله ده قد ابني ولو عملت إعلان ناجح زي إعلان بنك مصر، وأبقى تريند والناس مبسوطة بيا، لازم ينكد عليا، ويبوظ اليوم.
وتابعت: تم طلاقنا بعد حلق رأسي وكان طلاق بائن، وبعد أن هدأت من الكارثة، شعرت أني لا أستطيع الاستغناء عنه ولازم أديله فرصة تانية، وإن مينفعش نبعد عن بعض بفجر في الخصومة، وكنت مؤمنة إن العلاقة مقدسة، وكنت بحبه وفاكراه ابني مش جوزي، وعملتله استوديو لشغلنا، وقمت بشراء كل الأغاني التي أعجبته بشيكات باسمي عشان متروحش منه.
شيرين: تعرضت للتنمر من حسام حبيب
وكشفت المطربة تعرضها للتنمر من حسام حبيب، قائلة: بعد ما عمل كل ده ألاقيه بيتهمني ويتنمر عليا، ويقولي تخنتي وبقيتي شبه أمك، وأنا عاوز واحدة أتباهى بيها قدام الناس تبقى حلوة ورفيعة وكلام من ده، بخلاف الخناقات التي تعرضت فيها للضرب والسحل على الأرض وشتيمة، عمر ما في إنسانة تقبلها على نفسها.
واصلت الفنانة حديثها قائلة: لما تم طلاقي رجعت له وأديته فرصة أخرى بشروط، وأن يكون مختلف عن بيت الزوجية، وألا يتعرض البنات لحالة نفسية سيئة، وكان بيتردد على بيتي عشان فيه استوديو تحت البيت وقتها وبينا شغل، وحاولت أهيأ البنات إنه لا زال موجود لحد ما تلاشت الوعود مجددًا، ورجعت المشاكل وقلة الأدب ترجع بلا سبب.
