ابنة حسن أبو السعود لـ القاهرة 24: والدي سبب شهرة شيرين ولا يمكن رد الجميل بإهانة
علقت رنا ابنة الموسيقار الراحل حسن أبو السعود، على حديث الفنانة شيرين عبد الوهاب، أمس، مع الإعلامية لميس الحديدي، في برنامج كلمة أخيرة، والذي أثارت الجدل من خلاله، وتعرضت لموجة كبيرة من الانتقادات.
وقالت رنا حسن أبو السعود، خلال حوارها مع القاهرة 24: اللي هقوله ده مش قصدي حاجة على شيرين عبد الوهاب، لكن أنا سمعت الموضوع النهاردة، أتأثرت أوي بصراحة ودمعت، لأنها اتقالت بطريقة مش لطيفة، ولكن أنا لو سألتيني بلتمس لها عذر جدًا، هي متقصدش أكيد وهي مضغوطة كفاية وعندها مشاكل كتير، وإحنا متعودين إن شيرين بتطلع تقول كلام مش متزن إلى حد ما، ولكن أنا مش هعرف أعمل أي حاجة غير إني أسامحها.
تصريحات رنا حسن أبو السعود
وأضافت رنا حسن أبو السعود: أنا أكيد كنت متوقعة إنها هتعتذر لأنها متقصدش، ولأن العلاقة بينها وبين والدي كانت علاقة قوية جدًا، شيرين طبعًا صوت بديع ومش هيتكرر بالنسبة لي، والبيت طبعًا ده كان بيتها، وبابا كانت بالنسبة له بنته وكان بيتعامل معاها بحب وسند، وهو اللي كان السبب إنه يطلعها ويوديها لـ نصر محروس ويقوله هتمضي معاها لأنها فنانة رائعة وصوتها رائع.
وتابعت خلال حديثها: أنا فاكرة أول مرة جت علشان بابا يسمع صوتها، جتلنا البيت، إحنا كلنا دمعنا من بحة صوتها الحلوة ونقاء صوتها، هو بالنسبة لها كان سبب في كل حاجة وسبب في شهرتها، مش ممكن هيكون رد الجميل أنها تكون بتهينه، مستحيل ومعتقدش إن تفكيرها كده، علشان كده من قبل ما هي تنزل الاعتذار مشكتش لحظة إنها عايزة تهينه.
