رنا حسن أبو السعود: نصيحتي لـ شيرين تركز في شغلها وصحتها وشكلها
وجَّهت رنا حسن أبو السعود، نجلة الموسيقار الراحل، النصيحة للفنانة شيرين عبد الوهاب، التي لاقت العديد من الانتقادات؛ بعد حديثها أمس مع الإعلامية لميس الحديدي.
وقالت رنا حسن أبو السعود، خلال حوارها مع القاهرة 24: أنا لو أملك النصيحة لـ شيرين؛ هي نصيحة أخوية من قلبي، هقول لها: إن إحنا محتاجين أغانيها، لأنها لما انقطعت فترة كبيرة؛ أنا كنت متضايقة، وأول ما نزِّلت حاجة؛ الناس كلها اتخضِّت، عشان تسمع شيرين عملت إيه، أنا أنصحها بجد إنها مش لازم تطلع في برامج كتير تتكلم؛ لأنها أكيد لما بتسمع الكلام ده هي وبناتها، بتضايق، لأ، عايزاها تركز في إنها تطلَّع أغاني حلوة، وتفنن وتركز في صحتها وشكلها، وربنا يصلح لها أحوالها كلها، وتفضل نجمة.
وأضافت رنا أبو السعود: المشكلة مع الفنان، إنه لما بيطلع يسيئ لحد تاني؛ رصيده هو اللي بيقِلّ؛ يعني الجمهور مش خسران حاجة، اللي هينضَرّ في الموضوع؛ هو صاحب الشأن، لأنه بيتحسب عليه.
وفي سياق آخر، كشفت شيرين عبد الوهاب سبب زيادة وزنها، وتحدثت عن علاقتها بـ حسام حبيب، إذ قالت خلال مداخلة هاتفية لها، في برنامج كلمة أخيرة: أنا كنت زي البدر، ولما عاشرته؛ بقيت شبه حسن أبو السعود، لكن خلاص أنا مش فاضياله دلوقت، أنا بحضَّر أحلى أغاني، وأحلى فيلم، وفيه دنيا مستنياني، وعالم تاني.
واعتذرت شيرين عبد الوهاب، لأسرة الراحل حسن أبو السعود، وذلك خلال تصريحها لـ القاهرة 24، حيث قالت: أقدم اعتذارًا رسميا لأسرة الموسيقار الكبير الراحل حسن أبو السعود، الله يرحمه، ولم أقصد توجيه الإهانة له ولأسرته، ولكن كنت أتحدث عن معاناة حياتي الشخصية خلال الـ 4 سنوات الماضية، والكلمة خرجت مني دون قصد، وبالتأكيد الموسيقار حسن أبو السعود قامة فنية كبيرة، وله أعمال كثيرة أثرت بالفن.
