خالد زكي: مفيش تقدير مادي لجيلي.. مش عايز نموت واحنا مش معانا مليم ولا عارفين نتعالج
أعرب الفنان خالد زكي عن استيائه من عدم تقدير الوسط الفني له ولجيله في الأمور المادية، مناشدًا المسئولين الاهتمام بجيله حتى لا يتوفاهم الله دون وجود أموال ولا يستطيعون الإنفاق على أمراضهم ودون اللجوء إلى الغير.
وقال خالد زكي في برنامج برنامج ليالي TeN الذي تقدمه الإعلامية بوسي شلبي: يجب الاستفادة بجيلنا، الجيل الكبير في السن بيبقاله أدوار معينة وبيبقى إضافة للعمل، فلازم يحصل اهتمام بجيلنا، ومينفعش يبقى في الوسط جيل كبير بس ومينفعش يبقى جيل صغير بس، الحياة فيها الصغير والكبير.
وأضاف خالد زكي: مينفعش عشان الفلوس أهدر تاريخ فني، وكمان من ضمن الحاجات اللي بتزعلني جدًا وتزعل الكثير من جيلي إنه ابتدى عدم وجود تقدير مادي لينا، ولما واحد من الجيل بتاعي يكون اشتغل 50 سنة في المهنة فلازم يتقدر ماديًا في النهاية، يعني مينفعش أكون باخد من 20 سنة 10 آلاف جنيه ودلوقتي حد يجي يقولي أخد 3 آلاف جنيه، الدنيا بتغلى، ولما برفض يقولك خلاص هجيب الفنان الفلاني.
وتابع خالد زكي: الموضوع ده لابد من تدخل قوي في هذه المسألة لصون كرامة الفنان اللي في جيلنا عشان مانموتش واحنا ممعناش ولا مليم، احنا المفروض نُكرم مش بس تكريم أدبي وشهادات ولكن في الاتفاقات المادية؛ لأننا في أواخر عمرنا مش هنقعد نعمل أكتر من اللي عملناه ومنلاقيش فلوس حتى نتعالج بيها، ومن خلال البرنامج بقدم رسالة للمسئولين وأنا بتمنى يصل رأيي ويُهتم بجيلنا فنيًا وماديًا حتى لا ينتهي عمرنا ومفيش في جيوبنا مليم نتعالج به.
