كيف تم اكتشاف مقتل شيماء جمال رغم إخفاء زوجها القاضي لكل الأدلة؟.. التحقيقات تجيب
أدلى المتهم الثاني حسين الغرابلي في واقعة مقتل الإعلامية شيماء جمال، وهو صديق القاضي أيمن حجاج المتهم بقتل زوجته المذيعة، الشهيرة بمذيعة الهيروين، باعترافات تفصيلية حول الواقعة، وملابساتها وظروفها، وكيف تم التخطيط لها وتنفيذها، وكيف حاول إخفاء الجريمة، والأسباب التي دفعته للاعتراف بالجريمة.
محاولة التخلص من الأدلة على قتل المذيعة شيماء جمال
فيما أضاف: أنا غسلت وشي وغيرت هدومي وأنا خارج لقيت أزايز مية النار مش موجودة فأنا قولتله عملت إيه بمية النار فقالي دلقتها على الجثة، وبعدين قعد يتكلم معايا وقالي أنا عارف إني ورطتك وأنا اللي عملت كل حاجة وخليك واقف جنبي ومش هنسالك ده، وقالي تعالى نقعد في أي كافيه وقعدنا فعلا في كافيه في شارع اللبيني وبعد ما أعصابنا هديت شوية قالي إنه لازم يمشي ويروح البيت عند مراته التانية علشان يجيب جاجات من هناك عبارة عن ورق وعقد الجواز وبعد كده مشي وقالي اسبقني على الكافيه في المهندسين وأنا جايلك هناك فطلعت على الكافيه.
كيف تم اكتشاف مقتل شيماء جمال
وقال صديق أيمن حجاج قاتل شيماء جمال: جالي وقالي شربت حاجة ولا لاء وقعد شوية وقالي أنه لما راح الشقة ملقاش غير العقد بتاع الشقة وملقاش عقد الجواز، وإدانی عقد الشقة وقالي بيع الشقة دي وخد نص تمنها وبعدين قولتله الدهب اللي معايا هتعمل فيه إيه قالي اتصرف فيه بمعرفتك، فقولتله أنا مش عاوزه وطلعته وادتهوله فقالي غيره بجنيهات دهب وخده ليك وخلاني أخش على جوجل وأعرف سعر الجنيه الذهب وبعد كده قولتله أنا مش عاوز الدهب ده وخده مني وكلم واحد صاحبه اسمه المستشار ع. ر وبالفعل جاء بعد تلت ساعة وأنا سلمت عليه ودخلت الحمام ولما رجعت سألت أيمن على الدهب بصوت واطي فقالي خلاص ملكش دعوة أنا اتصرفت، فأنا قعدت شوية وأخرت نفسي علشان مراتي وأولادي كانوا فاهمين إني مسافر وبعد كده قولتله لازم أروح لأني كنت متوتر وخايف وروحت البيت الساعة 2 الصبح ونمت وصحيت الصبح كلمته فمردش عليا ورجع كلمني على الساعة 11 ونص الصبح وقالي إن أم القتيلة راحت عملت محضر تغيب في القسم لبنتها وقالي أنا دلوقتي في القسم هخلص وأكلمك وقفلت المكالمة معاه وانتظرت يكلمني وهو بالفعل كلمني حوالي الساعة 3 ونص العصر وقالي أنت فين وطلب يقابلني في نفس الكافيه اللي اتقابلنا فيه يوم الواقعة في اللبيني وقابلته على الساعة 4 ونص.
قاتل شيماء جمال يحرر محضر تغيب لزوجته الإعلامية
وقال: حكالي إن أم القتيلة عملت مشكلة معاه وقالتله أنت وديت بنتي فين، وهددته أنها هتعمل محضر لبنتها وهتقول إن أنا جوزها فأنا اضطريت إني أروح اعمل محضر تغيب وقعد يحكيلي على الإجراءات اللي عملوها معاه في القسم وأنه ارتبك لأنه مكنش مرتب إنه يحصل البلاغ ده، وقالي كمان إن المباحث كانوا بيسألوه نزلها فين وبعد كده فأنا سألته هنعمل إيه دلوقتي وقولتله أنت ورطتني معاك فقالي أصبر أنت ملكش دعوة بالموضوع ده، فأنا قولتله إن النية كانت إنك ترهبها وتخوفها إيه اللي خلى الموضوع يوصل لكده، فقالي هو ده اللي حصل وبعد كده قالي أي حاجة بيني وبينك على الواتس آب أو أي حاجة تاني أمسحها من على موبايلك وبعد كده قالي تعالي معايا هنروح نادي مجلس الدولة هنجيب خطوط تليفون واحنا في العربية حاول يعمل كذا تليفون لأم مراته اللي ماتت، مكنش عارف يوصلها وبعد كده كلم واحد تبعه فرد عليه رئيس المباحث وفضل يسأله على كام حاجة بخصوص واقعة التغيب فهو اتوتر جدا، وقفل معاه وخدنا بعد كده رحنا القهوة في العجوزة وقعد يتكلم في التليفون كتير لحد الساعة 11 ونص بالليل.
تابع المتهم الثاني: بعد كده اتصل بالسواق بتاعه قالي هاتلي العربية عند نادي الزمالك وأنا وصلته عند بوابة نادي الزمالك والعربية جاتله وأنا نزلته وروحت على البيت وحكيت لمراتي وأولادي اللي حصل، وكلمني الصبح الساعة 8 وقالي أنا جايلك وبالفعل جالي الساعة 9 الصبح وكان معاه ناس في العربية وخدني وطلعنا على المزرعة ووصلنا المزرعة وكان في شوية تبن كلف العيال نقلوهم في مكان تاني جوة المزرعة، وقالي روح شوف الفلاح اللي جنبنا علشان عاوزين نشتري عجلين تلاتة نحطهم في المزرعة، وأنا بالفعل رحت قعدت مع واحد جار المزرعة وكنت بسأله على أسعار العجول وبعد كده أيمن جه قعد معانا شوية، وبعد كده دخلنا المزرعة تاني فأنا شفت العيال كانوا بينقلوا التبن من مكان لمكان خمنت أن المكان اللي بينقلوا التبن فيه ده هو المكان اللي مدفون فيه جثة القتيلة.
