المتهم بقضية قتل شيماء جمال: القاضي قالي متخفش هوديك الساحل الشمالي تقضي يومين | تحقيقات
أدلى المتهم الثاني حسين الغرابلي في واقعة مقتل الإعلامية شيماء جمال، وهو صديق القاضي أيمن حجاج المتهم بقتل زوجته المذيعة، الشهيرة بمذيعة الهيروين، باعترافات تفصيلية حول الواقعة، وملابساتها وظروفها، وكيف تم الخطيط لها وتنفيذها، وكيف حاول إخفاء الجريمة، والأسباب التي دفعته للاعتراف بالجريمة.
قاتل شيماء جمال يهدد شريكه حسين الغرابلي
قال شريك القاضي المتهم بقتل شيماء جمال: بعد ما الناس خلصت قعد معايا وكان بيهددني وبيقولي أني لو حكيت اللي حصل ده الموضوع مش هيعدي على خير، وإوعى تفتكر انك ملكش دعوة، ومن النهاردة تقطع علاقتك بالمزرعة ومتجيش هنا تاني فقولتله يا باشا أنا مش حمل الكلام ده، أنا من يوم الواقعة مش بعرف أنام وبنهار، وأنا مش حمل المباحث أنا لو اتقبض عليا ممكن أنهار وأقول على كل حاجة، فخاف وقالي أنا هوديك تختفي يومين تلاتة في قرية في الساحل الشمالي، وبالفعل اتصل بحد وحجزلي شاليه في قرية اسمها فينسيا في الساحل الشمالي، وقالي جهز نفسك علشان تسافر، وبالفعل رجعنا على الكافيه اللي في شارع اللبيني وقعدنا هناك وكان في واحد بتاع كاميرات جنب الكافيه، راح اتفق معاه أنه يركب له كاميرات في المزرعة وبعد كده كلم حد جاله اسمه حازم تقريبا.
واستكمل المتهم الثاني حسين الغرابلي: وصّلني على البيت وخد الناس بتاعت الكاميرات وطلع على المزرعة، ورجعلي حوالي الساعة 6 ونص المغرب وطلعت على الساحل الشمالي بعربيتي وكنت أنا وهو وتقى بنتي وحمادة ابني، ووصلنا لحد بوابة القرية، ونزل قعد في الكافيه اللي عند بلبع وإداني رقم تليفون الراجل اللي هكلمه علشان يوصلني الشاليه، وبالفعل كلمت الراجل ووصلني الشاليه لأنه كان سايبلي خبر، وحمادة ابني وصلني لحد الشاليه ورجع خده من عند الكافيه، ورجعوا للقاهرة وبيّت أنا وبنتي تقى في الشاليه، وتاني يوم كلمت حمادة ابني لقيته في المزرعة وقالي أن الناس بتاعت الكاميرات شغالة في المزرعة والمباحث جت سألت على تاريخ تركيب الكاميرات، وبعد كده المستشار كلمني وقالي إن المباحث كانت موجودة في المزرعة علشان كانت بتسأل على سرقة عربية، وقالي متقلقش وأنا هاجي أخدك أنقلك مكان تاني فأنا اتوترت وكلمت حمادة وقولتله يجيب أمه وابني التاني وييجوا على الساحل، وبالفعل حمادة وصل ليا الساعة 10 بالليل وقعدنا نتكلم مع بعض واتفقت أنا ومراتي والأولاد إني مرحش معاه في حته وقعدت مستنيه لحد ما وصل عندي الساعة 7 ونص الصبح.
شريك أيمن حجاج يعترف بالجريمة
واختتم المتهم حسين الغرابلي صديق المتهم أيمن حجاج قاتل الإعلامية شيماء جمال: القاضي حاول ياخدني معاه مكان تاني وأنا ركبت معاه لقيت شكله متغير ومعاه الطبنجة بتاعته فأنا خفت منه واتهربت منه بحجة إني أجيب شنطة هدومي ورحت ركبت مع حمادة إبني ورحنا على القرية، وخدنا حاجتنا ورحت على إبراهيم أخو مراتي وبيشتغل محامي وحكيت له على اللي حصل وخدني الصبح وجبني على نيابة جنوب الجيزة الكلية وطلبت إني أقول الأقوال اللي عندي، وده كل اللي حصل.
