القائمة تحولت لـ تجارة وجشع.. الفنان محمد سليمان: اتقوا الله واتبعوا شرع ربنا
كشف الفنان محمد سليمان، رأيه في فكرة إلغاء قائمة المنقولات الزوجية، التي تداولها رواد مواقع التواصل الاجتماعي خلال الساعات الماضية، مشيرًا إلى أن موضوع القائمة تحول إلى تجارة والماديات؛ أصبحت تشغل كل ما يهم الأسرة، وأبعدتهم عن الهدف الأساسي، وهي سعادة بناتهم.
وقال محمد سليمان في تصريح لـ القاهرة 24، إن فكرة إلغاء القائمة صحيحة جدًا، لأن الهدف من الزواج أن الأهالي يساعدون أبنائهم من أجل الزواج، ولكن بسبب موضوع القائمة؛ أصبحت الماديات هي الهدف الأساسي، وتحول من الزواج إلى مادي فقط، وانتقل إلى تجارة.
محمد سليمان: حق البنات محفوظ من غير قايمة
وحول حفظ القائمة لحقوق المرأة في حالة طلاقها، أوضح الفنان: حق البنات محفوظ من غير قائمة.. افرض البنت اتجوزت إنسان غني، ولكن مش كويس معاها.. لو حصل انفصال؛ فين حقوقها، بأنها تأخذ دولاب وبتوجاز.. هو ده حقها.. هو ده اللي يسعدها وهيسعد أبوها.. ده عبارة عن شوية حاجات ملهاش لازمة.. مش ده حقها.
وتابع محمد سليمان: حق البنت إنها لو اتجوزت إنسان مش كويس تطلق منه وتديلوا بالجزمة.. لو عمل حاجة غلط يدخل السجن، ولو عندها أطفال يصرف عليهم، لكن هعمل إيه بالقائمة هرميهم بالزبالة.
وأضاف: من حق الفتاة على والدها، أن يكون حريصًا على اختيار شريك حياتها، ليس من المنظور المادي، ولكن يجب أن يدرس شخصيته وأخلاقة، وهل هو على قدر كافٍ إنسانيًا لكي يسعد ابنته أو لا، ويجب أن يرعى الله في ابنته.
واستكمل الفنان محمد سليمان، قائلا: مش القائمة هي اللي هتتتعامل مع البنت.. الراجل اللي هيتعامل معاها.. هل الراجل ده محترم ولا لأ؟.. المفروض الأب يدور على راجل مش على قائمة.
محمد سليمان: اتقوا الله في زواج بناتكم وأولادكم
وتطرق محمد سليمان، للحديث عن المقارنات التي تحدث في مغالاة المهور والقائمة، قائلًا: الناس اللي بتفكر في القائمة عن طريق المقارنات.. دول ناس جهلة، ومحدودي التفكير وميعرفوش حاجة، ومعندهمش أي ثقافة عن الحياة.
محمد سليمان يوجه رسالة للأباء
ووجّه الفنان رسالة للأباء، قائلًا: اتقوا الله، واتبعوا شرع ربنا الحقيقي في جواز بناتك وأولادك، والرسول صلى الله عليه وسلم قال: "لَا تُغْلُوا صُدُقَ النِّسَاءِ"، مضيفا: الناس هي اللي جشعة، وبقى عندنا خوف وعشق للماديات، وهو ده اللي بيضيعني.
واختتم سليمان، حديثه: واحد يروح يزوج بنته لراجل غني، وميفكرش يسيبها تتزوج اللي هي بتحبه.. الغني عُمر ما فلوسه هتسعد البنت.. هتفضل طول عمرها مش مبسوطة، مع أنها لو اتزوجت الفقير ربنا ممكن يكرمهم ويبقوا أغنى الناس.. عايز أقول للناس انتوا حُرين.. عايزين تتجوزوا الفلوس اتفضلوا.. عايزين تتجوزوا السعادة والحب الحقيقي اتفضلوا.
