فادية عبد الغني عن شائعة وفاتها: عملولي صوان وصوروا الفنانين وهما بيعزوا
تحدثت الفنانة فادية عبد الغني عن بعض الشائعات التي تعرضت لها، وكذلك تحدثت عن حقيقة منع أولادها من التمثيل.
وأكدت فادية عبد الغني، خلال لقاء تلفزيوني، أنها لم تمنع أبنائها من دخول عالم التمثيلـ قائلة: عمري ما منعت ولادي أنهم يعملوا حاجة نفسهم فيها، بنتي عمرها ما فكرت تكون ممثلة، وولادي ما لهمش في الحكاية دي مع أن إحساسهم حلو وينتقدوني، وسارة بنتي مثلت معايا وهي صغيرة عمرها سنة ونصف ومرة وهي عندها أربع سنين، وبعد كده الموضوع ما بقاش في دماغها.
كما تحدثت فادية عبد الغني عن بعض الشائعات التي أزعجتها ومنها حلاقة شعر ابنتها وفرض الحجاب عليها، قائلة: اتقال إني فرضت عليها الحجاب وحلقت لها شعرها علشان أمنعها من التمثيل، الناس دي بتعمل كده عشان تكسب من الكلام الفاضي والشائعات اللي ملهاش لازمة.
وتابعت متحدثة عن شائعة وفاتها: طلعت عليا شائعة إني مت من ناس محترمة، وعملوا ليا صوان وصوروا الفنانين اللي بيعزوا وانا في بيتي كافية غيري شري بعديها بالصدفة تعبت وجالي كورونا وزعلت جدًا.
وفي سياق غير متصل، تحدثت فادية عبد الغني عن زواجها، قائلة: اتجوزت صغيرة، وأنا عندي 18 سنة، دلوقتي الموضوع اختلف لأن الحالة الاقتصادية اختلفت والشباب مش معاه الفلوس اللي تخليه يتجوز فالبنات يا حرام بيتجوزا متأخر، ولكن الجواز بدري بيخلي البني آدم يعجز بدري اللي إذا كانت الجوازة حلوة أوي.
