أبو الليف: نقابة الموسيقيين تعاني من الفساد وشوفوا أملاك زوجات أعضاء النقابة
ناشد الفنان نادر أبو الليف، المسؤولين بالتدخل ومتابعة ما يدور داخل نقابة المهن الموسيقية، إذ يرى أن النقابة تتعرض للنهب من قِبل أعضاء المجلس.
وقال أبو الليف، في تصريحات تليفزيونية، إن أعضاء مجلس نقابة المهن الموسيقية، يحصلون على أموال مقابل تشغيل مطربي المهرجانات الشعبية وإعطائهم تصاريح لإقامة الحفلات: المجلس بيشغل بتوع المهرجانات في الساحل زي الفل، واللي بيشغلوا بتوع المهرجانات بياخدوا فلوس، بياخدوا أرقام، ولو صاحب المكان مدفعش بيعملوا له مصيبة سودا، وممكن يقفلوا المكان.
وأضاف أبو الليف: كل حاجة بيعملوها بمزاجهم، وبيحللوا كل حاجة ليهم ولمصلحتهم، أنا نفسي المسؤولين يشوفوا ولاد وزوجات أعضاء مجلس نقابة الموسيقيين عندهم إيه، وأملاكهم إيه.
وطالب أبو الليف، بالتدخل لما أسماه بالفساد داخل نقابة المهن الموسيقية، قائلًا: بناشد المسؤولين، يشوفوا حساب زوجات وأبناء أعضاء مجلس نقابة المهن الموسيقية في البنوك، وعندهم أملاك إيه، أُمّال هما ميتين على الكرسي ليه، ومش عايزين يقدموا استقالة ليه؟.
كما تحدث عن موقف أعضاء نقابة المهن الموسيقية، من أزمته الأخيرة، ومطالبته بدفع تكاليف المستشفى الذي تلقى به العلاج، قائلًا: ولا مخلوق كلمني، وأنا لما بكلمهم مبيردوش، ولما رد عليا الأستاذ حمادة أبو اليزيد اللي هو المفروض أخويا ومتربي في بيته ومتربي في بيتي، قالي 15 ألف يا أبو الليف، ومفيش اجتماع مجلس النهاردة، أنت شايف النقابة وشايف الدنيا هايجة علينا إزاي.. أعمل إيه بـ 15 ألف جنيه؟، ده في واحد أنا مستلف منه 25 ألف جنيه، أقول له إيه ده؟ والباقي أعمل معاهم إيه؟.
واختتم أبو الليف حديثه قائلًا: الموضوع أكبر من كده، في ناس محسوبيات بتدخل مستشفيات وبتاخد علاج، ومبيدفعوش ولا مليم، النقابة اللي شايلة.. أنا بناشد المسئولين يدخلوا يشوفوا النقابة فيها إيه، النقابة بتتنهب.
