غادة نافع: الستات واخدين حقهم في عهد الرئيس السيسي.. وقائمة المنقولات عيب
كشفت الفنانة غادة نافع عن رأيها في جدل قائمة المنقولات الزوجية على مواقع التواصل الاجتماعي، إذ طالب البعض بإلغائها وتحمل الزوج جميع مصاريف الزواج، بجانب الحديث عن حقوق المرأة في المجتمع.
وقالت غادة نافع لـ القاهرة 24: الستات بقت واخدة حقها في عهد الرئيس السيسي وبقينا نشتغل في جميع الوظائف وحقنا بناخده بالقانون، ومش ناقصنا حاجة دا حتى الرجالة بقوا غلابة وبعض الستات مفترية.
وواصلت غادة نافع: شايفة أن قائمة المنقولات كلام فاضي وعيب جدًا نتكلم في العفش والممتلكات، وكنت بشوفها زمان وأنا طفلة ودلوقتي بعض العائلات اللي بتكتبها من ناحية الحفاظ على حقوق بنتهم مع إن ممكن تطلع هي اللي وحشة وتجنن جوزها وتسرق العفش لأن أحيانًا فيه ستات وحشة زي ما فيه رجالة وحشة.
أما عن انتشار ظاهرة التحرش وربطها بملابس المرأة، علقت غادة نافع، قائلة: اللبس ملهوش علاقة بالتحرش، لأن سببه الأساسي قلة التربية والدين ودلوقتي الستات بتجيب حقها بالقانون.
وأضافت غادة نافع: لو حد فكر يتحرش بيا هعلقه من قفاه وهوديه القسم وأبلغ عنه، وبقول للمتحرش مش لازم تتجوز وممكن تصلي وتصوم وتعمل حاجة مفيدة وتشتغل زي السوريين اللي في بلدنا بدل ما تأذي غيرك وتفكر في الشر.
ومن ناحية أخرى، كشفت غادة نافع سبب ابتعادها عن الساحة الفنية الفترة الماضية، مؤكدة أنها لم تعتزل ولكنها لم تجد عملًا مناسبًا لها وتنتظر إيجاد نص مناسب.
