وفاء سالم عن جرائم القتل المنتشرة: منقدرش نقول القاتل مريض نفسي.. إحنا مش حُكام على البشر
علقت الفنانة وفاء سالم ، على انتشار الجرائم بكثرة في الآونة الأخيرة واتهام بعض الأعمال الفنية بأنها السبب، مؤكدة أن الفن يساهم في تشكيل المجتمع، بجانب الحديث عن سبب قلة أعمالها الفنية.
وقالت وفاء سالم لـ القاهرة 24: وقائع القتل بتتكرر لأن مجرد حدوث حاجة بتكون قابلة للتكرار تاني، والناس بتبدأ تفكر وتقول ليه منعملهاش ما هي حصلت، والدليل إننا شوفنا واحد عمل نفس جريمة نيرة أشرف وهددها الأول وأنا قريت الكلام ده واتصدمت وهو أكيد شاف واقعة نيرة وقال طب ما أعمل أنا كمان زي محمد عادل.
وأضافت وفاء سالم: وفي النهاية أحنا منقدرش ننصب نفسنا حُكام على البشر وأطباء نفسيين ونقول القاتل مريض نفسي أو مجنون، أقصى شيء نعمله أننا نحاول نفهم الواقعة وناخد عبرة منها وممكن بعض الأعمال الفنية تساهم في انتشار الجريمة لأن الفن بيشكل المجتمع وممكن لو حد من جمهوري بيحبني يقلدني.. ولازم كل فنان يُدرك إنه مسئول عن الناس اللي بتحبه ويخلي باله من كلامه وتصرفاته.
أما عن سبب قلة أعمالها الفنية، علقت وفاء سالم، قائلة: معنديش رفاهية الاختيار، ومش برفض أعمال فنية لكن بنتظر يتعرض عليا شيء يناسبني، وبنقول أحيانا إننا بنرفض أعمال حفاظا على ماء الوجه وكوني محبوبة من الجمهور ملهوش علاقة بعدد الأعمال اللي بتتعرض عليا، والفن مفهوش اختيار ونقول هنقبل إيه ونرفض إيه.
