8 قواعد ليكي للتعافي من العلاقات المؤذية
خلينا نسأل نفسنا السؤال المهم الأول: هو أصلا ينفع نتعافى من تجربة علاقة مؤذية مرت في حياتنا؟
حقيقي الإجابة موجودة في السؤال، طالما بنتكلم عن علاقة مرت يعني خلاص خدنا قرار إننا ننهيها، فده أول خطوة للتعافي وأصعبهم وهنتكلم فيها بالتفصيل في مواضيع تانية لإننا مع كل أسف ممكن نضيع سنين طويلة عشان نعرف ونقدر ناخد القرار ده.
بس بما إننا هنا، يعني خلاص خدنا القرار فخلينا نتكلم عن خطوات ونصايح الخبراء وعلماء النفس لتخطي تجارب العلاقات المؤذية والتعافي منها:
الصبر والتقبل، تقبلي انتهاء العلاقات بالأيام الحلوة والأيام السيئة مش معنى كده إن مشاعرك لازم تكون انتهت بشكل قاطع ولكن العلاقة هي اللي انتهت، فتصبري على نفسك شوية شويتين تلاتة لحد ما ترجع تاني متوازنة وده ياخدنا للنقطة التانية.
قطع التواصل تماما، ودي واحدة من أكتر القواعد اللي اتفق عليها خبراء العلاقات وهتساعدك إنك تعملي move on بشكل أسرع وأفضل، وهي إنك تقطعي التواصل تماما The No Contact Rule ووفقًا للقاعدة دي حضرتك على الأقل محتاجة 60 يوما متواصل من عدم التواصل مع الطرف الآخر نهائيا عشان تستعيدي توازن مشاعرك ناحيته وميكونش حضوره فارق معاكي وبيأثر على طاقتك.
فرغي مشاعرك وعبري عنها، اسمحي لنفسك إنها تاخد وقتها من الحزن ومن كل المشاعر السلبية التي لازم تحسي بيها، ده مش ضعف بالعكس من الصحي جدا تعبري عن مشاعر الألم جواكي بس المهم تختاري دواير الثقة اللي تعبري ليهم عن ألمك ده، حاوطي نفسك بعيلتك وأصحابك إلي بيحبوكي بجد طاقة الحب قادرة على المداوة والشفاء.
وما كان ربك نسيا، وقتك إنك تقربي أكتر من ربنا صلي أكتر وابكي لربك.. ابكي على سجادتك وادعي كتير، اقرأي عن قصص سورة الكهف عشان تعرفي أن دوام الحال من المحال، اقرأي عن قصة ستنا مريم عشان تعرفي أد إيه رحمة ربنا بمشاعر النساء ورفضه الحزن لينا في كل الأديان.
اكتشفي نفسك من جديد، أكيد كان فيه حاجة نفسك تعمليها بس مأجلاها أو مترددة، ده الوقت مناسب ليها بالتأكيد، سواء هواية أو رياضة أو سفر أو.. إلخ، فأكبر تحدي ليكي وقت فراغك لو قدرتي تشغلي وقتك وتفكيرك هتعدي المرحلة دي بأمان.
ممتنة للحاضر طموحه للمستقبل، بصي حواليكي وسجلي كل النعم اللي في حياتك مارسي فضيلة الامتنان هتلاقي حاجات تستحق وقتك ومجهودك، مستقبلك يعني شغلك وتطويرك لنفسك وقبل كل ده صحتك أصل الواحدة مننا ملهاش غير صحتها وفلوسها بعد ربنا.
تجنبي العلاقات الجديدة أي حد يقولك عنيها فيها حزن، يبقا بلوك فورا مش محتاجه كلام، في الوقت ده المتصيدين كتير والحنينين أكتر فشكرا.. مغلق للصيانة.
إلجأي لخبراء متخصصين، لو حسيتي إنك مش قادرة تتخطي المرحلة دي لوحدك وصعب عليكي فمش عيب ابدا تلجأي لطبيب نفسي أو استشاري علاقات seek a professional help، الخطوة دي هتساعدك تحددي مشاعرك وتدركي أفكارك وتأثيراتها وازاي تتعاملي معاها، هتساعدك تعرفي نفسك بشكل أعمق وازاي تعالجي التروما الناتجة عن العلاقات المؤذية إلي مريتي بيها.
أخر حاجة افتكري التعافي مش خط مستقيم ليه نقطة بداية ونهاية، هو أشبه بعملية process في أيام هتكوني فيها كويسة جدا وأيام تانية هتحسي فيه بالألم مش معنى كده إنك بترجعي خطوات لورا بالعكس تقبلي الألم ده، تعايشي معاه لحد ما تغلبيه في يوم وهتقدري تعملي ده، افتكري الصبر ثم الصبر ثم الصبر ثم الرحمة بنفسك وقلبك.
