جلطة وعملية في الأمعاء.. هدى المفتي تكشف تفاصيل تعرضها لوعكة صحية
كشفت الفنانة هدى المفتي، تفاصيل تعرضها لوعكة صحية شديدة عقب إصابتها بفيروس كورونا خلال الفترة الماضية؛ مما اضطرها للخضوع لعملية جراحية في الأمعاء.
وقالت هدى المفتي، خلال لقائها في برنامج معكم، الذي تقدمه الإعلامية منى الشاذلي، والمذاع عبر شاشة قناة CBC: رجعت من الجونة بكورونا، وكانت لسه الكورونا في الأول، وكنت من أول الناس اللي يجيلها في مصر، وما كنتش عارفه إيه اللي يحصل.
وأضافت هدى المفتي، أنها شعرت بألم غريب، ولم تكن تعلم ما الذي يسبب لها هذا الألم، قائلة: طبعًا ما أخدتش أدوية سيولة لما جاتلي الكورونا؛ فجالي جلطة في الوريد اللي بيوصل الدم للأمعاء، وما عرفتش، هو بس كنت بحس بأعراض معينة، وبحس بحرقان غريب، وكنت فاكره إن في حاجة في القلب عندي، وعملت رسم قلب، بس ما طلعش في حاجة.
وواصلت حديثها: في رأس السنة، سافرت أنا وصديقتي لأسوان، وفجأة تعبت تعب مش طبيعي وجع مؤلم، ورجعت القاهرة بطيارة بسرعة، واتبهدلت، ولولا صاحبتي؛ كان حصلي حاجة، وهي كانت بتساعدني في كل حاجة.
واستطردت: دخلت المستشفى في القاهرة، والدكاترة مش عارفين أنا عندي إيه، وعملت أشعة، وكل حاجة، ومش عارفين، وبطني بتتنفخ، ووجع وألم غير طبيعي، وقرروا يفتحوا بطني ولما فتحوا؛ طلع عندي جلطة في الوريد اللي بيوصل الدم للأمعاء، وبسبب إنه ما اتعالجش؛ عمل غرغرينة في جزء من الأمعاء.
وأكملت هدى المفتي: فقررا يستأصلوا الجزء ده، وكانت عملية كبيرة، وفضلت فترة طويلة في العناية المركزة، أكتر من شهر، ومنعوا عني الأكل والماء.
