إسلام إبراهيم يهاجم والد المطرب النقاش: الناس مش بتخلف العيال عشان تستعبدهم
هاجم الفنان إسلام إبراهيم والد المطرب النقاش أحمد سالم، بسبب عدم الاهتمام به وبشقيقه وتشجيعهما على تنمية مواهبهم بعيدًا عن العمل في طلاء المنازل.
وكتب إسلام إبراهيم على حسابه الشخصي بـ فيسبوك: أنا عارف إن الكلام اللي هقوله ده ممكن ميعجبش ناس كتير بس أنا شايف الترند ده من زاوية تانية خالص، فكرة أنك ربنا يرزقك بشابين زي دول ينطبق عليهم كلمة شباب زي الورد لأنهم ربنا كارمهم بالوسامة والموهبة والصوت الحلو وعندهم المؤهلات أنهم يكونوا نجوم ومتحاولش تساعدهم أنهم يحققوا حلمهم أو يعملوا الحاجة اللي بيحبوها.
إسلام إبراهيم: النقاش مهنة محترمة وشريفة
واستكمل إسلام إبراهيم: بتفرض عليهم قيود ومسؤوليات مش بتاعتهم زي إن هما يجهزوا أخواتهم البنات اللي أكبر منهم حضرتك البنات دول أنت اللي خلفتهم مش هما والحياة دي حياتك انت مش حياتهم هما وتفرض عليهم يكونوا نقاشين وده مش تقليلا من مهنة النقاش أكيد هي مهنة محترمة وشريفة لكن أي حد مش موهوب يقدر يشتغلها لكن مش أي حد عنده الموهبة والصوت ده.
واختتم إسلام إبراهيم حديثه: خلاصة الكلام إحنا مش بنخلف العيال عشان نستعبدهم إحنا عندنا مفاهيم مغلوطة كتير في فلسفة الجواز والخلفة والتربية وزي ما طاعة الوالدين واجبة وأي ابن بيفتح بقه أو يعترض على حاجة مش عجباه بيبقى ابن عاق كمان الولاد أمانة هتتسئل عليها قدام ربنا.
وكان المطرب النقاش أحمد سالم قد تصدر تريند مواقع التواصل الاجتماعي، بعد انتشار فيديو له أثناء غنائه بكره يا حبيبي للفنانة الجزائرية وردة، خلال عمله في طلاء المنازل.
