علي لوكا: بطلوا مخدرات وخمرة الأول وبعدين اسألوا على المزيكا حرام ولا حلال
عبّر الفنان علي لوكا مطرب أغنية متخافيش ياما، عن رأيه في حرمانية الموسيقى، موجهًا رسالة شديدة اللهجة للمنتقدين، وذلك بعد الجدل المثار بين مطرب الراب مروان موسى والموزع الموسيقي مولوتوف على مواقع التواصل الاجتماعي خلال الأيام القليلة الماضية.
وقال علي لوكا، عبر خاصية ستوري لحسابه على موقع تبادل الصور والفيديوهات القصيرة انستجرام: بطلوا مخدرات وخمرة الأول اللي متأكدين إنها حرام طبعًا وبعد كده اسألوا على المزيكا حرام ولا حلال.
وسبق، وتساءل مروان موسى عبر تويتر، عن حرمانية الموسيقى، وكتب: هي المزيكا حرام.
ليجيبه مولوتوف قائلًا: الآذان مزيكا والقرآن بيتقال بمقامات شرقية موسيقية فالموسيقى جزء من الحياة والكون والطبيعة واللي بيقول إنها حرام فاقد لمعنى الحياة وعايز الناس كلها تعيش في سجن وبجد لو في حد شايف المزيكا حرام وبيسمعني أقولكو أخرج من عندي عشان أنا مش بحب الناس المتناقضة.
ورد مطرب الراب سلايفر على مولوتوف، قائلًا: الآذان يقال على مقامات والقراءة تقرأ بالمقامات ودي قواعد تلاوة وقول.. ملهاش علاقة بالمعارف والموسيقى.. الآذان بيتقال بدون موسيقى والقرآن بيتلى بدون موسيقى.. دا شق ودا شق تاني.. وكون الموسيقى بتعزف بنفس المقامات ميخليهاش حلال زي أي سلاح ذو حدين.
وأضاف سلايفر: قرارك الشخصي في إنك تعمل الشيء دا مش من حق أي حد يتدخل فيه وفي طريقة توظيفك ليه، لكن إنك تحل بشكل صريح موضوع اختلف عليه كبار الأئمة ومعظمهم مال إلى التحريم دا مش صح والأحسن متشيلش أنت الذنب كإنسان مؤثر في المجتمع بقناعاتك اللي ممكن بشكل كبير متبقاش صح، والله أعلم برضوا أنا زيي زي كتير زمايلي في الصراع دا وربنا يهدينا جميعًا.
