بيتك قبل شغلك | نقيب أطباء القاهرة: سبت كارير بحبه عشان ولادي.. ومش ندمانة
تداول مستخدمو مواقع التواصل الاجتماعي، فيديو لشيرين غالب، نقيب أطباء القاهرة، ومسئول اللجنة التنفيذية للصحة والسكان في المجلس القومي للمرأة، تقدم به عدة نصائح لفتيات طب الأزهر في أسيوط خلال حفل تخرجهم، تنصحهم باختيار المنزل والأولاد أولا ثم العمل.
نصائح نقيب الأطباء للفتيات
في هذا السياق، قالت الدكتورة شيرين غالب، إن التصريحات التي تداولها مُستخدمي مواقع التواصل الاجتماعي خلال حفل تخرج طالبات طب أزهر أسيوط، خرجت بشكل ارتجالي منها، مشيرة إلى أنها نصحت الفتيات على الجانب المهني أيضًا، ولكن تم اقتصاص كلامها على الجزء الخاص بالاهتمام بالبيت ورعاية الأولاد.
وأضافت غالب في تصريحات خاصة لـ القاهرة 24: مستخدمو السوشيال ميديا عجبهم الجزء ده وقصوه وعملوه تريند، وده اختياري ووجهة نظري، وده كان رأيي، والناس اللي زعلانة من كلامي هما أحرار، كل واحد حر في رأيه.
أول امرأة تعمل كـ نقيب أطباء القاهرة
وتابعت: الحمد لله إني نجحت ووفقت بين الاتنين.. أنا اختارت وكان اختياري سليم، والحمد لله حصلت على ماجستير ودكتوراه في الطب الشرعي والسموم، وأصبحت أستاذ في كلية القصر العيني، وتم انتدابي رئيس قسم في طب بني سويف لمدة 10 سنوات.
واستكملت: أنا أول نقيب ست لأطباء القاهرة، وتم اختياري في اللجنة التنفيذية للصحة والسكان في المجلس القومي للمرأة، وأنا الحمد لله ناجحة جدًا، وأنا أول طبيبة شرعية تحصل على الزمالة البريطانية من إنجلترا.
وأردفت غالب: أنا سبت كرير كنت بحبه وكنت ناجحة فيه، وهو الجهاز الهضمي، ولكن حسيت إني ممكن اختار مجال تاني أخف يخليني أقعد مع بناتي أو مشتغلش بالليل، واتكرمت من عدة دول زي كوريا الجنوبية ورئيس تايوان ووزير العدل المصري، وترأست مُؤتمرات دولية كبرى.. أنا ناجحة في بيتي وناجحة في شغلي.. آه سبت كارير بحبه عشان بيتي نمبر وان.
وأكدت: الأم هي الأم، أنا مش ضد المرأة ولا مع حد ولا ضد حد.. أنا بتكلم من خلال خبرتي، وأنا معروف عني أني ضد العنف ضد المرأة، بس الأمومة ليها متطلباتها.
وأفادت الدكتورة شيرين، بأنها لم تندم على تصريحاتها، مردفة: لم أندم على هذا التصريح أبدًا، وما زلت مُصرة عليه، وسأقوله مرة واثنين وعشرة، وأنا حرة في رأيي وكل شخص حُر في رأيه، ولست نادمة على أي شيء عملته.
كلامي لا يتعارض مع عمل المرأة
وأضافت نقيب أطباء القاهرة: أنا مع عمل المرأة تماما، لأننا لا نعرف الظروف، فنحن لا نعلم ما سيحدث لها، ومن الممكن أن يتوفى زوجها أو يمر بأزمة مالية أو لا تتزوج من الأساس ولا تجد من يُنفق عليها، ولكن ما يناسب اللي مع بيتها.
وتابعت: أنا عملت ماجستير باطنة وكنت بحب شغل الجهاز الهمضي، وكان نفسي أكمل فيه، ولكني غيرت عشان يناسب بيتي، فاخترت الطب الشرعي، وكل ما الولاد ما تكبر بتبقى قدامي فرصة أعمل حاجات أكتر.
واختتمت حديثها مع القاهرة 24، قائلة: أنا أي بنت بتاخد رأيي بقولها انزلي اشتغلي عشان يبقى معاكي قرش وليكي مكانة، وكمان من الناحية النفسية بتخرجي طاقتي وبتحسي بنجاحاتك، ومتبقيش قاعدة طول النهار في شغل البيت.
وخلال الفيديو المتداول، وجّهت غالب حديثها للفتيات، قائلة: نصيحتي لكل البنات المتخرجين النهاردة.. بيتك ثم بيتك ثم أولادك، وبعدين مهنتك.. أوعي حد يقولك مهنتك قبل أولادك.. أوعي.. حضرتك لو قعدتي في البيت.. فيه مليون طبيب برة هيعالج، لكن لو سبتي ولادك، ملهمش غير أم واحدة.. هو إنتي.
