فاروق فلوكس: الناس مش سايباني في حالي.. وفيه أعمال حاليًا مينفعش نقول عليها فن
كشف الفنان فاروق فلوكس، سبب قلة أعماله الفنية، مؤكدًا أنه لم يعتزل، بجانب الحديث عن وضع الوسط الفني.
وقال فاروق فلوكس لـ القاهرة 24: أنا طول عمري راجل واضح ومعتزلتش ولكن مفيش أعمال مناسبة ليا وأنا حر في النهاية بس تعبت بسبب أن الناس مش سايباني في حالي ونفسي كل واحد يهتم بـ نفسه فقط، وحاليًا فيه أعمال مينفعش نقول عليها فن لأنها لا تمت بالفن بـ صلة.
وواصل فلوكس: فيه عدد قليل من المسلسلات الجيدة وفيه أعمال حرام فيها الفلوس والإنتاج ومش بفهم بيقولوا إيه ولا إيه رسالتها بس السبب أن كل حاجة بقت بالقوة والناس بتغني وتمثل بالقوة والعافية وبقول لهم اتقوا الله.
وأضاف فاروق فلوكس: الأعمال دي عمرنا ما شوفناها في جيلنا وحتى المشاهد الجريئة كانت زمان موجودة لأن الجمهور متقبلها وكل شيء له وقته على عكس دلوقتي فيه مشاهد مينفعش تتعمل.
أزمة فاروق فلوكس الصحية
وعلى جانب آخر، تعرض فاروق فلوكس لأزمة صحية منذ فترة، إذ خضع لعملية المرارة بعد تدهور حالته ونقله لأحد المستشفيات الكبرى في القاهرة، وطمأن فاروق فلوكس جمهوره عقب العملية وذلك في تصريح سابق للقاهرة 24، قائلًا: عملت عملية المرارة وبقيت كويس ولكن محدش كلمني من الفنانين وربنا يخلي ليا أولادي وأحفادي، وحابب أوجه الشكر لكل من سأل عليا.. والحمدلله على كل شيء.
