8 علامات هتأكدلك إنك مع الراجل «الصح»
خلينا بس نوضح إن العلامات دي لو لاقيتي شوية منها أو كلها فده مؤشر قوي إنك مع الشخص الصح ومش معنى كدة إن لو علاقتك مفيهاش أي حاجة من دول يبقا شريكك الحالي شخص "مش كويس" أو "وحش" بالعكس ممكن يكون شخص كويس جدا بس مش المناسب ليكي، جمعتلك إشارات وعلامات مقدمة من خبراء العلاقات عن شخصية الراجل المناسب أو زي ما منى زكي قالت نسيت أقولك إني اخترت الشخص الصح يابو علي.
“جد وهيخطط معاكي لمستقبلكم" الشخص المناسب هتلاقيه بياخد خطوات جدية ناحيتك، وهيبدأ في التخطيط لحياتكم سوا، صدقيني مفيش حاجة بتوقف الراجل لما يكون بيحب واحدة فعلا، فلو لاقيتيه بيتهرب، بيستهبل ومش بيكلمك في أي خطوة جاية، بيظهر ويختفي بمزاجه يبقا مش هو ده اللي يستحق عناء المحاولة for you he is not the one.
"هتتخانقوا عادي بس فيه حدود" هتعرفي تتخانقي معاه وتختلفوا، تمام زي وقتكم الحلو سوا، بإنكم تدوا لبعض مساحة تعبروا عن غضبكم ومشاعركم من غير ما حد يستغل نقط ضعف التاني.
"هيكون صديقك المفضل" يعني أول حد بتبقي عايزة تكلميه لما يحصلّك حاجة جديدة، خناقة، ترقية في الشغل، طبخة طلعت حلوة سواء حاجة حلوة أو وحشة فالشخص ده هو أول حد بيجي على بالك تكلميه.
"أهلك فرحانين بيه" صحابك وعيلتك متقبلينه وبيحبوه، ممكن الكلام ده يبان "قديم" شوية بس الأهل والصحاب بيكونوا ليهم نظرة أعمق منك من غير عواطف، وبالمثل هو كمان بيحب أهلك وبيحترمهم، ده مؤشر أمان عالي ليكي في العلاقة.
"بيعرف يتصرف وقادر يحميكي" أكيد هتحسي معاه بالأمان بدنيًا وعاطفيًا ونفسيًا معاه لو في موقف محتاجة مساعدة هتلاقيه مبادر ومش هيضايق أبدا لو طلبتي المساعدة، المساعدة هنا بس مش موقف صعب، ممكن موقف مضايقك، نقط ضعفك نفسيا، حتى لو عايزاه يشيل حاجة عشان تقيلة عليكي، لو هو الراجل الصح هيحميكي حتى من شر نفسه.
"بيفتكر تفاصيلك" وده بقا على مستوى الأحداث المهمة بينكم زي عيد ميلادك مثلا، وميقلش عنها أهمية تفاصيلك الصغيرة، هيركز فيها ويعرفها وبيهتم بيها زي نوع الشيكولاتة المفضلة ليكي، الأفلام والأغاني اللي بتحبيها.
"بيعرف ازاي يضحكك" he knows how to make you laugh: متستغربيش لما ياسمين صبري قالت "بيضحكني" فدي من أهم علامات العلاقة الصحية إن الشريكين يكون فيه بينهم فكاهة وضحك ديما.
"الفرصة الأولى هي الفرصة الأخيرة" هيكون مخلص ليكي أدامك والأهم من وراكي، مش هيطلب منك فرصة تانية لأنه ببساطة مش هيبوظ فرصته الأولى معاكي، ستيف هارفي مرة اتسأل ليه الراجل بيضيع الفرصة التانية فكانت إجابته عبقرية الصراحة قال "الراجل بيضيع الفرصة التانية عشان انتو بتسامحونا وبتدونا فرصة تانية" عشان كدة الراجل اللي عايزك فعلا عمره ما هيبوظ فرصته الأولى معاكي.
طبعا أكيد في بداية العلاقات ممكن تلاقي حاجات من دي كتير عشان كدة فيه قاعدة بتقول Don’t be an open book at the first date يعني متعرّفيش اللي قدامك مفاتيح شخصيتك ولا شكل العلاقة والشخصية اللي عايزاها لأن ببساطة هيستخدمها الطرف الآخر عشان يبهرك ويوقعك في حبه على مدار الأسابيع الأولى في العلاقة، طب إيه الحل؟! الحل إنك تسيبي الطرف اللي قدامك يبذل المجهود المطلوب عشان يكتشف شخصيتك ويعرف يتعامل معاكي، وفي نفس الوقت إنتي تقدري تحكمي على الشخصية بحيادية، أما بقا إزاي تفرقي بين "حلاوة البدايات" و"سمات العلاقة" اللي انتي فيها فالوقت والمواقف هما الإجابة وهنتكلم عن ده بالتفصيل في مقالات جاية.
دمتِ جميلة.
