شهيرة تبكي حزنًا على محمود ياسين: مش قادرة أتجاوز الموضوع.. أنا محطمة
تحدثت الفنانة شهيرة عن زوجها الراحل الفنان محمود ياسين، مشيرة إلى أنها لا تستطيع أن تتجاوز حزنها عليها وتشعر أنها محطمة.
وقالت شهيرة خلال لقاء تلفزيوني: مش قادرة أتجاوز وفاة محمود ياسين لحد دلوقتي، مش عارفة طبعا بحاول على صفحتي كل الفانز بيقولوا لنا وحشتنينا، لكن في الحقيقة محمود ما يتعوضش كزوج وإنسان مفقتدة حاجة كبيرة أوي في حياتي أنا مش مظبوطة ومحطمة.
وأضافت: جيت النهاردة عاوزة أخرج من الحالة اللي أنا فيها كل صحابي بيقولوا لي لازم تخرجي من الحالة وأني واحشة الناس، ولازم أبقى قوية شوية لأني ساعات بكون محطمة، وولادي عوضوني شوية، وبيهتموا بيا وبيحاولوا يطلعوني ويقولوا لي ما ينفعش تبقي قافلة على نفسك، لأن الحزن الزايد عن اللزوم بيأثر عضويًا وصحيًا ومحمود كان إنسان رائع وراقي وكان متفرد.
ومن ناحية أخرى، تحدثت شهيرة، عن إمكانية عودتها من جديد للساحة الفنية بعد غياب دام لسنوات طويلة، مؤكدة إنها ما زالت تتلقى العروض، ولكنها مترددة وتشعر بالخوف من ذلك، موضحة: بكون متحمسة جدًا وقتها، ولكن لما بفكر وأقول طب والورق، أهم حاجة الورق لأني بقالي فترة طويلة أوي مطلتش على الناس بأي دراما، فبعد السنين دي كلها الواحد بيبقى قلقان، ومش عارف بعد السنين الطويلة دي هيقدم إيه للجمهور، هل هقدم حاجة يقولوا لي لأ يا ريتك ما عملتيها ما انتي كنتي قاعدة وإحنا حابينك كده.
