عمرو أديب لوزير الطيران الجديد: ليه عندنا في المطارات بيخلعونا الجزم؟
قال الإعلامي عمرو أديب، إن السياحة تمثل طوق نجاه لمصر ويجب تطويرها من خلال تطوير المطارات المصرية، مضيفا: عايزين نعالج المشاكل اللي موجودة في مطاراتنا، نحتاج لجعل تجربة السفر عبر المطارات المصرية أفضل، لو محتاجين حركة سياحة عظمية لازم نهتم بالمطارات.
وأضاف أديب، خلال برنامجه الحكاية، المُذاع عبر فضائية mbc مصر، مساء اليوم الأحد: حصل تطوير كبير في شركة مصر للطيران سواء في الطائرات أو أطقم الضيافة أو الطيارين، ولكن محتاجين مطاعم مصرية وسوق حرة كبيرة، مردفا حديثه: محتاجين مطاعم نضيفة وسوق حرة كبيرة وتغيير في جداول المرتبات.
رسالة لوزير الطيران الجديد
وناشد مقدم برنامج الحكاية؛ وزير الطيران الجديد، قائلًا: “نفسي وزير الطيران يزور صالة 2 بمطار القاهرة، الصالة فيها مشكلة في الدخول والتفتيش”، متسائلًا: هل معقول يا فندم عربيات الشنط في المطار تكون بايظة ومتهالكة؟، وليه عندنا في المطارات بيخلعونا الجزم؟، مضيفًا: العربات المخصصة لحمل الحقائب بالمطارات عمرها الافتراضي انتهى، مؤكدا: “تجربة ركوب طيارة والهبوط في مطار كويس هتخلي الناس ترجع تاني.. أما لو المطار مش كويس مش هنزل فيه”.
وأضاف الإعلامي عمرو أديب، قائلًا: “المطار البوابة الأولى في مصر والسياحة العظيمة تحتاج لمطار عظيم”، مستكملًا: “محتاجين تطوير لمطاراتنا لاسقبال السياحة.. والمطارات بتاعتنا مفيهاش تقسيم للجوازات يعني المصري مع الأجنبي كله مع بعضه، محتاجين تنظيم، السياحة نعمة من ربنا ولازم نستعد لها، بلاش الشغل اللي بيحصل للسائحين والحركات دي، لازم نرحب بالسياحة ونتعامل معاهم بثقافة”.
