صفية العمري: إحنا عملنا تاريخ بمسلسلاتنا.. والقنوات التلفزيونية هي المستفيدة
أعربت الفنانة صفية العمري، عن غضبها الشديد، بسبب عدم حصول الفنانيين على عائد مادي مقابل عرض أعمالهم على القنوات التلفزيونية.
وقالت صفية العمري في تصريحات تلفزيوينة: ما أقدرش أغير حياتي المهنية دلوقتي، دي شغلتي اللي بحبها واتعودت عليها وللأسف أنا غضبانة لأن إحنا عملنا شغل حلو أوي وعملنا تاريخ.. أنا بتكرم على ليالي الحلمية وهوانم جاردن سيتي لغاية دلوقتي لأن العمل عايش ومستمر والناس بتشوفه، وكل قناة عايزة تفتح بتبدأ بالحلمية، أنا اتكلمت كتير في موضوع حقوق الفنان في عرض المسلسل على القنوات ودخلت القانون، ولما البرلمان يفعل القانون يبقى ماشي، لكن محدش مهتم.
وأضافت معربة عن أسفها بسبب تكفل الدولة بعلاج الفنانيين، قائلة: إحنا الفنانيين اللي أعمالنا بتتذاع كل يوم المفروض يبقى لينا عائد والحقوق بتاعتنا ناخدها لكن محدش مهتم، العالم كله بيدفع للفنان، المنتجين مش هتدفع من جيوبها، لكن القنوات هي اللي مستفيدة والفنان مش مستفيد بحاجة، للأسف النهاردة فيه فنانيين كتير مرضى، هل ينفع إن الدولة هي اللي تعالج الفنان؟ أنا غضبانة جدًا.
وأشارت صفية العمري، إلى أن مسلسل هوانم جاردن سيتي، ساهم في تنشيط السياحة في مصر قائلة: أنا كنت قاعدة مع سيدات قالولي إحنا أول ما نزلنا مصر قولنا إحنا عايزين نروح جاردن سيتي علشان نشوف هوانم جاردن سيتي.. جاردن سيتي كانت من الأحياء الرائعة والمهمة جدًا في مصر، زي ما اتقال في تركيا السياحة اتعملت علشان المسلسلات، كانوا بيجوا مصر بردو علشان يشوفوا جاردن سيتي، ولكن للأسف الشديد النهاردة المنتجين قاطعوا الفنانيين.
