مادلين طبر بعد انتقاد تصريحاتها عن البوركيني: هو الدين والحشمة نزلوا قريب؟
ردت الفنانة مادلين طبر على الانتقادات التي تعرضت لها بعد دفاعها عن المايوه وانتقاد البوركيني، إذ أوضحت أنه من الطبيعي أن ترتدي أي امرأة تريد نزول البحر مايوه، وليس بوركيني لأن ذلك يعد ظلمًا للمرأة المصرية.
وقالت مادلين طبر لـ القاهرة 24: أنا أعرف اللي عايزة تعوم تلبس مايوه قطعة واحدة وفوقها تربط شال أو كاش مايوه وتستمتع بالمياه والشمس، لأن العوم هو انطلاق بعد تعب، لكن ليه الست تلبس كم طويل وبنطلون طويل وياقة، فيه إيه؟، تتظلم بره المياه وفي إجازتها، لأ ويقنعوها أنه لمصلحتها ولحمايتها.
وأضافت: طيب جدتك ويمكن والدتك اللي عامت بمايوه وركبت البسكلتة والشورت والميني، دي مكانتش ست محترمة ومتدينة؟؟وهو الدين والحشمة نزلوا بس من كام سنة؟.
الست عايزة ترضي الراجل وبتخسر نفسها
واستكملت: الست عايزة ترضي الراجل، وتتجنب زنه ونقده، تحت عذر بيحميها، وعمالة تتنازل وتتنازل وتزيد من قضبان سجنها عشان ترضي المجتمع الذكوري المتخلف ومش عارفه أنها بتخسر نفسها.
وكان مادلين أثارت الجدل بتصريحاتها بعد ردها عن وصفها بالجريئة بسبب مشهد لها بالمايوه في فيلم الطريق إلى إيلات، مشيرة إلى أنها ارتدت مايوهًا في مشهد حتى تغري البحار الإسرائيلي، موضحة أنه من الطبيعي أن ترتدي أي امرأة تريد نزول البحر مايوه وليس بوركيني لأن ذلك يعد ظلمًا للمرأة المصرية.
وأوضحت مادلين طبر خلال تصريحات متلفزة: دي سخافة الناس التافهة اللي بيبصوا على ربع مشهد عملته وكان لازم أنزل البحر عشان أغري البحار الإسرائيلي وأجرجره علشان أنزل المياه وأشوف الشباك.
واستكملت: هلبس بوركيني.. ولا بوركيني فاسو اللي مطلعينه ده؟ لأ طبعا اللي عاوزة تعوم تلبس مايوه قطعة واحدة، لكن تتخنق بالمطاط من فوق لتحت ده ظلم يمارس ضد المرأة المصرية، ويقولوا إنه لحمايتها، ما تتلموا إنتو يا رجالة وماتبصوش، المشكلة في الراجل المصري مش الست المصرية.
