بلاش تاخد من اليتيم فلوس.. مُعلم يوجه رسالة للمدرسين مع بدء العام الدراسي الجديد
انتشر على مواقع التواصل الاجتماعي منشور لمعلم لغة عربية على موقع خلال توجيه لرسالة للمدرسين قائلا: لو انت مدرس بلاش تاخد من اليتيم فلوس، لو جالك اتنين توأم خليهم بسعر واحد بس، لو لقيت طالب خاتم القرآن بلاش تاخد منه فلوس تكريمًا له ولأسرته، لو جالك طالب حالته المادية صعبة بلاش تعامله ماديًا كباقي الطلاب، التدريس رسالة قبل أن يكون مهمة.
الحقيقة إن معظم المدرسين مش بياخدوا فلوس من الأيتام
وتابع المدرس في منشور آخر، قائلا: الحقيقة إن معظم المدرسين مش بياخدوا فلوس من الأيتام والفقراء والمحتاجين والمقربين والأقارب، الحقيقة إن الدروس الخصوصية هى اللي شايلة التعليم، زي ما عيادات الدكاترة هي اللى شايلة القطاع الطبي والصحة، وشوف نفسك لو عندك مريض بتروح بيه فين؟
اتقوا الله ف المدرسين اللي بيعلموا أولادكم وبيشاركوا في تربيتهم معاكم
واستكمل المعلم خلال المنشور الخاص به، قائلًا: "اتقوا الله ف المدرسين اللي بيعلموا أولادكم وبيشاركوا في تربيتهم معاكم، هتقولي في مدرس وحش وبيستغل الظروف، ولي الأمر مش عايز درس خلاص بلاش دروس لابنك محدش أجبرك على الدروس، لكن المدرس اللي أنت بتتهمه وتهينه ربما يكون ابنك ف يوم من الأيام وبالتأكيد هو أخوك أو قريبك أو جارك.
كلامك بيفرق معانا جدًا وبيودينا لحتت أبعد ما كنا نتخيل
وانهالت التعليقات المؤيدة لرسالة المعلم، حيث قالت أماني السيد: بجد كلامك بيفرق معانا جدًا وبيودينا لحتت أبعد ما كنا نتخيل، بينما قالت نور سعيد: ادي ومتستناش مقابل مش كل حاجه الماديات في ناس تستحق المساعده والتقدير.. اتعامل مع كل طالب حسب إمكانياته وشجعه وكن قدوة صالحة ليه.
فيما عبرت هدير محمد على تأيديها على هذا المنشور قائلة: ربنا يرضيك ويرضا عنك والله ويكتر من أمثالك.
جدير بالذكر، أن تلك الرسالة لم تكن الرسالة الأولى اللافتة للانتباه للمعلم المذكور، حيث كتب المعلم على صفحته على فيس بوك خلال الساعات الماضية رسالة لافتة للانتباه لطلابه الذين لهم فيديوهات غير لائقة على برنامج التيك توك.
وقال المعلم في رسالته: أي طلاب عندي هلاقيهم منزلين فيديوهات تيك توك وعمالين يتنططوا ويرقصوا (بشكل غير لائق) هيبقى ليهم امتحان مخصص كل حصة، واللي هيقل في الامتحان عن 90% مش هيكمل معايا.
