هيثم شاكر: والدتي توفت من غير ما تعرف مرضي.. وكنت شايف حياتي سودة
كشف الفنان هيثم شاكر، تفاصيل إصابته بمرض سرطان في القولون منذ فترة، موضحًا سبب عدم إخبار والدته بمرضه.
وتحدث هيثم شاكر عن مرضه، وذلك من خلال لقائه مع الإعلامية منى الشاذلي في برنامجها، حيث قال: مش بحب أشارك مشاكلي الشخصية مع حد، بحب أتحمل مسئولية لوحدي، ومش بحب أصعب على حد، ووالدتي توفت من غير ما تعرف مرضي، بحمد ربنا على كل حاجة حصلتلي، اكتشفت إني عندي سرطان في القولون، واستسلمت زي أي حد، وسافرت أتعالج بره.
وتابع هيثم شاكر: وقولت لكله عدا والدتي، وكنت شايف حياتي سودة، ومستني قدر ربنا، وحسيت إن حياتي هتنتهي، وفي دكتور نفساني متابع معايا، وقالي عيش اليومين اللي فاضلين دول، محدش عارف الغيب، بدأت أتعلق بالحياة أكتر، وكنت شغال في ألبوم أحلى قرار، إلا أن ربنا منّ عليا بالشفاء، وربنا عالم بكل حاجة، ومش بيبعت حاجة وحشة، ومن حوالي 10 سنين أو أكثر، عملت عملية في معدتي، واكتشفت المرض بالصدفة، كانت قرح في البداية، وتحولت إلى سرطان، ووالدتي كانت بالنسبة ليا كل حاجة، علشان كده مرضتش أقولها، ومكنتش هتستحمل تعرف كده، ووفاتها كسرتني.
هيثم شاكر: المواقف بتبين الناس على حقيقتها
وأختتم هيثم شاكر حديثه: المواقف بتبين الناس على حقيقتها، قولت للناس القريبين علشان يبقوا جنبي، ملقتهمش، وناس عرفت بالصدفة وفضلوا جنبي، أتغير في حياتي كتير جدًا، الحياة مش مستاهلة أي حاجة، وعندي يقين إن ربنا هيعمل الأحسن للبنى آدم، مهما الواحد جري، القدر مكتوب، وواخد الـ 24 قيراط كاملين، ولازم أسعى وأجتهد وأعمل اللي عليا، وأصبح بداخلي سلام أكثر، الصحة مفيش أغلى منها، وهي السند الحقيقي.
