أمانة شاب.. أعاد 6 آلاف جنيه لصاحبها بعد عثوره عليها بماكينة ATM بالأقصر
دفعت الأمانة شابا يدعى إسلام إبراهيم أحمد علي 22 سنة من منطقة العوامية بالأقصر لإعادة مبلغ 6000 جنيه لصاحبها، بعدما عثر عليها بماكينة ATM خاصة بأحد البنوك بجوار شركة المياه، أثناء توجهه لسحب أموال منها.
كنت رايح أسحب فلوس
قال إسلام في تصريحات خاصة لـ القاهرة 24: كنت رايح أسحب فلوس من ماكينة ATM الخاصة اللي عند شركة المياه، وكنت منتظر دوري بعد راجل وكانت معاه مراتة منتقبة، وتقريبا الماكينة علقت معاه فأخد الفيزا بتاعته وقالي المكنة مفيهاش فلوس.
المكنة مش ساحبة الكارت
وأكمل إسلام: دخلت وراه قلت أجرب حظي وأشوف، جيت أدخل كارت الفيزا بتاعتي، ماكينة ATM مش قابلاه وأنا مستغرب، ببص لقيت فلوس كتيرة طالعة ومتعلقة في مكان خروج الفلوس، قلت أكيد دي بتاعة الراجل اللي كان قبلي.
معرفش الفلوس كام
وتابع: أخدت الفلوس كلها من غير ما أعرف كام وفضلت أنادي على الراجل اللي كان مشي بعيد لآخر الشارع ومن صوت العربيات لأن الشارع عمومي مسمعنيش، فجريت وراه بسرعة عشان ألحقه واديتله الفلوس ومكنش مصدق، وبعدين عرفت إن المبلغ كان 6000 جنيه لما صاحب الفلوس قال.
وأضاف: رجعت تاني لماكينة ATM عشان أنا مكنتش سحبت فلوس ليا، لقيت الراجل جاي ورايا، قلت يمكن في حاجة لقيته بيسلم عليا بحرارة وبيعرفني بنفسه إنه اسمه المهندس أحمد بيشتغل في شركة المياه وصاحب شركة عقارات.
دي أمانة لازم ترجع لأصحابها
وأكمل: سألني على اسمي ورقم تليفوني بعد ما شكرني، وقالي مش عاوز حاجة حتى حقك إنك لقيت الفلوس ورجعتها وكان عاوز يكافئني، رفضت طبعا وقولتله دي أمانة وكان لازم ترجع لأصحابها والحمد الله رجعتها.
وقال: اللي عملته ده أي شاب مكاني واتحط في الموقف ده أكيد هيعمل كده، والحمد الله بلدنا وأهلها لسة بخير.
