نهى العمروسي: دخلت السجن ظلم.. وجالي مرض واتهموني إني بشرب المخدرات
علقت الفنانة نهى العمروسي على اتهام البعض لها بتعاطي المخدرات، مشيرة إلى أنها سُجنت ظُلمًا، ولم ترتكب أي جريمة، هذا إلى جانب حديثها عن إصابتها بمرض في الغدة الدرقية.
نهى العمروسي: دخلت السجن ظلم.. وجالي مرض واتهموني إني بشرب المخدرات
وقالت نهى العمروسي، في تصريحات تليفزيونية: أنا اتظلمت، ودخلت السجن، وعملولي تحاليل، وطلع إني مش بشرب مخدرات ولا سجاير.. وبالتالي؛ أدافع عن نفسي في إيه؟، اللي عايز يتكلم عني ويشتمني؛ هيعمل كده، وأنا مش هدافع عن نفسي؛ لأني لما طلعت براءة، قالوا عني: بتاعة مخدرات، ومفيش فايدة فيهم، وقولت هسيبهم يتكلموا براحتهم.. وبقول لهم آه، أنا بضرب حقن.. عايزين إيه تاني؟.
وواصلت نهى العمروسي حديثها: أنا جالي مرض في الغدة الدرقية، وقالوا بردو بسبب المخدرات.. هو مفيش غيري اللي بيشرب مخدرات؟، وده كلام مالهوش أساس، واللي بيقول كده هتلاقيه هو نفسه بيضرب مخدرات، وبيعكس اللي فيه عليَّا.. وأنا مريضة بـ نشاط في الغدة الدرقية، وهو المرض اللي عانت منه كوكب الشرق أم كلثوم، وبيخلي الإنسان يخس، ويكون عنده جحوظ في العين.. ومش بسبب المخدرات أبدًا.
كما أكدت نهى العمروسي، أنها ظلمت نفسها، قائلة: محدش ظلمني، وأنا اللي عملت في نفسي كده وظلمتها؛ لأني جذبت لنفسي أشياء سلبية، وقبل القبض عليا؛ كنت بهزر مع واحدة صاحبتي، وقولت لها: القبض على نهى العمروسي مع مجموعة شباب، وبعدها بشهر، اللي قولته اتحقق، واتكتب نفس الكلام كـ عنوان في الجرايد.
