محمد ثروت: حضَّرت لأغنية هنسيب الغنا لمين منذ 5 أشهر.. وأتمنى النقيب الجديد يهتم بالعازفين
تحدث الفنان محمد ثروت، عن أغنيته الجديدة هنسيب لمين الغنا، والتي طرحها أمس عبر موقع يوتيوب، عقب عودته من النمسا بعد إجرائه عملية جراحية في القلب.
محمد ثروت: حضَّرت لأغنية هنسيب الغنا لمين منذ 5 أشهر
وقال محمد ثروت، في تصريحات تليفزيونية: الحمد لله، أنا عملت العملية التانية في النمسا، وقعدت هناك لغاية ما استقريت، ولسه راجع أول إمبارح، واللي حواليا حبوا يغيروا المود، ويدوني دفعة إيجابية، ونزِّلوا الأغنية دي، اللي كنا بنحضَّر لها من 5 شهور، والوعكة دي على رأي المثل القديم: تسلمي يا شدة؛ بتعرَّف إن الناس بتحبك، والناس هي أغلى حاجة في الدنيا، عشان كده ربنا خص الإنسان بالعقل، ومَيِّزُه، عشان كده الإنسان غالي.
وكشف محمد ثروت، كواليس تحضير الأغنية، حيث قال: أحمد ثروت بذل معايا مجهود، وجابلي أحمد المالكي، وأحمد أمين الموزع، وسمَّعوني الكلام، وعجبني، وسجلنا، وكنت مستني أشوف ردة الفعل، والناس هتستقبلها إزاي، وأنا اللي يهمني إن الناس تبقى مبسوطة، ربنا يكفي الناس شر الدنيا؛ لأن دي فعلًا تاج البني آدم، في فلوس، بس ماتجيبش صحة، الصحة والأولاد والأصدقاء والابتسامة، عطيَّة من ربنا.
وأضاف محمد ثروت: البلد دي طيبة، وناسها طيبين، ومهما حصل، أرض البلد دي بتزرع الطيبة في نفوس اللي عليها، وتخلي اللي جاي من الشرق والغرب مصري، بلدي مالهاش نظير، بشوارعها، بابتسامة حد بيحبك، بـ ميكروباص بيزنَّق عليك.
كما تحدث محمد ثروت، عن نقابة المهن الموسيقية، وعن مشاركته في انتخاباتها المقبلة، ولمن سيُدلي بصوته؛ للحصول على مقعد النقيب، قائلًا: الغناء مهنة من ضمن المهن، كل فنان سبقني؛ أستاذي، وله فضل عليا، أنا لسه جاي دلوقت، وبالفعل هيكون طبيعي إني أشارك في انتخابات نقابة المهن الموسيقية، وأشوف مين هيقدر يلبِّي احتياجات النقابة في الفترة اللي جايه.
وأوضح أن نقابة المهن الموسيقية، نقابة مهنية، مسؤولة عن سلامة عضو النقابة، والذي اكتسب عضويته بها من أجل أن يعمل، والأعمال الفنية لها قنوات شرعية تدافع عنها، منها: الرقابة على المصنفات الفنية التابعة لوزارة الثقافة، وإن كان هناك خروج عن المألوف؛ لدينا مباحث الآداب، ومباحث المصنفات، والرقابة على المصنفات الفنية.
وأشار محمد ثروت، إلى أنه يريد من النقيب المستقبلي لنقابة المهن الموسيقية؛ تلبية احتياجات أعضاء النقابة، والاهتمام بالعازفين، قائلُا: عايزُه يعمل تدريبات للعازفين، ويعمل فرقة موسيقية للنقابة؛ لأن فيه موسيقيين مابيشتغلوش، الموسيقي ممكن من قعدته؛ يصدِّي، إحنا بشر، وفيه حاجات أهم بكتير من إني أمنع فلان وعِلَّان، الأهم، إني أشوف مشاكل النقابة، والناس اللي طلعت معاش، والناس اللي حالتها الصحية تعبانة، والناس اللي معندهاش سكن نحاول نشوف سكن على قد ما تقدر النقابة.
