خالد سرحان: هل عقلية كبيرة زي عقلية الزعيم عادل إمام يجيلها زهايمر؟
طمأن الفنان خالد سرحان، جمهور الزعيم عادل إمام، على حالته الصحية، بعد الشائعات التي أُثيرت خلال الساعات الماضية، حول إصابة الزعيم بـ ألزهايمر.
وقال خالد سرحان، في مداخلة هاتفية مع الإعلامي خيري رمضان، في برنامجه حديث القاهرة، المذاع عبر شاشة قناة القاهرة والناس: أنا شُفت الزعيم قريبًا جدًا، والسوشيال ميديا جننت الناس والتريند ده عمل خلل في الدنيا ومش ممكن كل صفحة عايزة تاخد كم من المشاهدة تطلع أي إشاعة عشان بيكسبوا من ورا ده دي حاجة أنا مش فاهمها سواء ده بيحصل من حد مسؤول أو مش مسؤول.
وتابع، متحدثًا عن عدم حضور الزعيم حفل زفاف ابنة شقيقه المنتج عصام إمام، قائلًا: الناس بتسأل ليه الزعيم مرحش فرح بنت أخوه، أنت متخيل إنه ممكن يروح فرح فيه 2000 بني آدم هيتلموا عليه ده ممكن الفرح نفسه يبوظ، مفيش حد يحتمل.
وأضاف: أستاذ عادل كويس جدًا، وهل عقلية كبيرة زي عقلية الزعيم يجيلها زهايمر يعني؟ الراجل بردو مركز وعارف وصحته بخير الحمد لله مفيش أي حاجة خالص وهو زي الفل، وساعات بيسخر من الصفحات اللي بتقول إن عادل إمام في المستشفى، فالموضوع بيقلب بسخرية لأنه كتر أوي.
واستكمل: أنا بطمن الناس على صحة الزعيم هو زي الفل، ومن حق الناس تخاف عليه لأنه في وجدان المصريين كلهم، ولكن رفقًا بالناس كفاية إشاعات هما بني أدمين بردوا وأولاده ممكن يزعلوا وأحفاده لأنهم شايفينه كويس، وكل شوية شائعات بتفّول عليه.
أما عن فيلم الواد وأبوه، فقال: فيلم الواد وأبوه ده المفروض إنه بيجمع بين الزعيم وابنه محمد ومن إخراج رامي، وهما بيحضروا له وعصام إمام هينتجه، والأستاذ عادل هيرجع إن شاء الله للشاشة، متسمعوش للشائعات السخيفة.
