سميحة أيوب: تخلّصنا من دراما السنج واللي بيشموا.. وبدأنا ندوّر على الأسرة
أعربت سيدة المسرح العربي، الفنانة سميحة أيوب، عن رضاها عن الأوضاع التي تخص الفن المصري في الوقت الحالي، ميشرة إلى أن اتجاه الدراما في الوقت الحالي اتجه نحو الأسر وتخلّص من أعمال العنف.
وقالت سميحة أيوب، في مداخلتها الهاتفية ببرنامج حضرة المواطن، الذي يقدمه الإعلامي سيد علي: أعتقد إن الموسم ده تخلصنا من السنج والحشيش واللي بيشموا، وبدأنا ندور على الأسرة والشيء اللي ينفع الناس.
كان فيه مسلسلات وحشة خسارة الممثلين اللي مثلوا فيها
وأوضحت أيوب: كان فيه مسلسلات رائعة وفيه مسلسلات وحشة خالص، خسارة الممثلين اللي مثلوا فيها، أنت عايز توصّل للناس إيه من خلال العمل، يعني الفن ده شيء تنويري، وفيه كام سنة كده اتعمل حاجات ميصحش إنها تطلع وأطفال يشوفوها، الألفاظ المستحدثة والغريبة على مصر، واللي ماسك سنجة، خلوا الأطفال يقلدوها.
وأضافت: دلوقتي أنا شايفة السنة دي إن فيه منحنى جميل جدًا بتتجه له الدراما، زي المناقشة السياسية والاجتماعية، وأنا سعدت إن فيه مهرجان للدراما وده بيشحن الناس، وبيخلي كل واحد بيعمل حاجة يعملها جيدة، علشان ممكن ياخد جائزة.
المهنة هترتقي من خلال التشجيع
واختتمت سميحة أيوب حديثها قائلة: الممثلين عندنا جُمال جدًا والجيل الجديد طالع حلو أوي أوي سواء بنات وشُبان، فالمنافسة بتكون للأحسن وكل واحد بيبقى عايز يبان أحسن وإنه فاهم أكتر، ويدي للناس أكتر سواء كان موسيقي أو مغني أو ممثل أو مخرج، المهنة هترتقي من خلال التشجيع.
سميحة أيوب
وعلى جانب آخر، كان آخر أعمال سيدة المسرح العربي، سيمحة أيوب، هو مسلسل انحراف، الذي عرض في موسم رمضان 2022، وحقق نجاح كبير وقت عرضه.
وشارك في مسلسل انحراف مجموعة من نجوم الفن، منهم روجينا، الفنانة القديرة لوسي، وسيدة المسرح العربي سميحة أيوب، وعبد العزيز مخيون، ورانيا محمود ياسين، ومحمد كيلاني، وأحمد صفوت، وسما إبراهيم، ومحمد مهران، وأحمد فؤاد سليم، محمد لطفي، والعمل من تأليف مصطفى شهيب، ومن إخراج رؤوف عبد العزيز.
