قاتلة رضيعتيها بالشرقية: من أول ما اتولدوا وأنا عاوزة أخلص منهم ومش عارفة | نص تحقيقات
ينفرد القاهرة 24 بنشر نص التحقيقات في القضية رقم 10812 جنايات مركز شرطة الحسينية لسنة 2022، المتهمة فيها ربة منزل تُدعى قمر خ أ ر، 18 سنة، بوضع السم لطفلتيها الرُضع التوأم المجني عليهما مكة ومليكة، وقتلهما داخل منزل حماتها في نطاق ودائرة مركز شرطة الحسينية.
وقررت محكمة جنايات الزقازيق، ظهر اليوم الأحد، إحالة أوراق المتهمة إلى مفتي الجمهورية، وحددت جلسة 16 أكتوبر المقبل للنطق بالحكم.
نص التحقيقات مع المتهمة بقتل طفلتيها الرُضع التوأم في الحسينية
س: متى وردت إليك فكرة التخلص من ابنتيك تحديدًا؟
- ج: من أول ما اتولدوا وأنا عاوزة أتخلص منهم ومش عارفة أخلص منهم إزاي، ولما شوفت السم فكرت إني أحطهولهم في اللبن علشان محدش يعرف وأكون اتخلصت منهم.
س: وما هو وصف الكيس الذي يحوي المادة السامة تحديدًا؟
- ج: هو كيس متوسط الحجم لونه أصفر ومكتوب عليه كلام إنجليزي باللون الأسود، وليه فتحة من الجنب والفتحة دي ليها غطاء أبيض.
ملحوظة: قمنا بعرض الكيس المتحفظ عليه بمعرفتنا من مكان الواقعة على الماثلة أمامنا -المتهمة- فأقرت أنه ذات الكيس الذي قامت باستخدام ما بداخله من مادة سمراء اللون في ارتكاب الواقعة محل التحقيق.
س: وما هي الأدوات التي قمتِ باستخدامها في الواقعة محل التحقيق؟
- ج: الكيس اللي فيه المادة السمرا، والببرونات اللي حطيت فيها اللبن، واللبن السايب اللي دوبت فيه المادة السمرا دي.
س: وما هو وصف تلك الببرونات تحديدا؟
- ج: ببرونات بلاستيك بتاعة الأطفال.
ملحوظة: قمنا بعرض الببرونات المتحفظ عليها بمعرفتنا من مكان الواقعة على الماثلة أمامنا -المتهمة- فأقرت أنهم ذات الببرونات التي قامت باستخدامها في ارتكاب الواقعة محل التحقيق.
س: وهل ما تحويه تلك الببرونات من لبن يحوي المادة التي بالكيس؟
- ج: لا، أنا رضعت العيال باللبن اللي فيه السم وبعدها غسلت البيرونات وحطيت فيها لبن نضيف.
س: وما هو وصف المادة بداخل ذلك الكيس تحديدًا؟
- ج: هي مادة سودا عاملة زي البودرة.
س: وما هو المقدار الذي قمتِ بوضعه داخل كل ببرونة من تلك المادة تحديدًا؟
- ج: أنا فضيت بالكيس وحطيت شوية معرفش قد إيه بالضبط لأني كنت ببص على الباب أحسن حد يدخل عليا ويشوفني.
س: ومن أین تحصلتِ على ذلك الكيس؟
- ج: أنا دخلت الأوضة اللي فيها حماتي سألتها عن الكيس بتاع سم الحشرات علشان أرش حوالين المرتبة اللي هنام عليها أنا وجوزي وعيالي، وادتهولي، وساعتها أخدته وسيبتها هي ومحمود قاعدين في الأوضة بيتكلموا، ودخلت الأوضة على جوزي وأولادي وكان جوزي نايم ومغطي وشه، وساعتها أنا حطيت من الكيس الأصفر في ببرونات العيال وحطيت عليه لبن ورضعتهم.
س: وكيف تحصلت المدعوة كوثر على ذلك الكيس؟
- ج: حماتي لقيته في الإسماعيلية وهي بتلم خردة هناك وجابته معاها هنا.
س: وهل أنتِ على علم مسبق بأن المادة الموجودة بذلك الكيس مادة سامة؟
- ج: أنا عرفت إنه سم حشرات.
س: وهل كنتِ على علم بأن تلك المادة مادة قاتلة تودي بحياة أطفالك؟
- ج: أيوة عارفة إن سم الحشرات بيموت.
س: وما هو الدافع وراء ارتكابك تلك الواقعة تحديدًا؟
- ج: علشان أنا عاوزة أخلص منهم من ساعة لما اتولدوا علشان مش ملاحقة عليهم مصاريف ومش عارفة أشتغل بيهم وأصرف عليهم حتى، وجوزى ساعات يصرف عليهم وساعات ما بيكونش معاه فلوس ومش عارف يصرف عليهم، وعلشان كده أنا فكرت أتخلص منهم.
س: وهل اشترك أحد معك في ارتكاب الواقعة؟
- ج: لا.
