عمرو يوسف: مسلسل وعد إبليس إنساني.. وشخصيتي بالعمل استفزتني
تحدث الفنان عمرو يوسف، عن مسلسله الجديد وعد إبليس، والذي يُعرض في الوقت الحالي عبر إحدى المنصات الإلكترونية، مؤكدًا إن العمل يناقش قضية إنسانية ولا يُصنف كمسلسل رعب.
وقال عمرو يوسف في تصريحات تلفزيونية: أنا أعتقد إن موضوع الشيطان رمزي أكتر من كونه الشيطان نفسه، يعني مثلًا لو قولنا إن فيه راجل عليه دين كبير والدين ده ممكن يدخل السجن، هل هيوافق إنه يرتشي؟ في الحالة دي بتكون الرشوة هي الشيطان، طبعًا المسلسل فيه جزء فانتازيا، إحنا مش بنعمل مسلسل رعب ولا أكشن ده مسلسل إنساني بحت.
مسلسل وعد إبليس
وأضاف: الجدل مش وحش، والموضوع ده لو كُنا دخلنا في تفاصيل تانية كان ممكن يحصل مشاكل، ولكن موضوع المسلسل إنساني مش بيتكلم عن إبليس، ولكن بيتكلم عن الاختبارات اللي بيتحط فيها الإنسان، لأن دايمًا مفيش حد عارف الاختبار الحقيقي هيجي امتى.
كما تحدث عمرو يوسف عن تفاصيل شخصيته بمسلسل وعد إبليس قائلًا: إبراهيم هو لحم ودم وبيخاف على بيته ومراته والهدية اللي ربنا إدهاله اللي هي الطفل، وكان عايز يمشي في سكة معينة وحصل اللي حصل وخدته في سكة تانية، وتصرفاته كانت غصب عنه ودي أولى عوارض إنه باع روحه للشيطان.
وتابع: شخصيتي بالعمل من الأدوار اللي بتيجي للممثل علشان تستفزه، علشان يحاول يطلع شخصيتين في شخصية واحدة، الحقيقة بذلنا مجهور كبير، وظروف العمل مهيئة للتحضير الجيد جدًا، أنا عملت بروفات كتير أوي، ومخرج العمل من المخرجين اللي بيوجهوا الممثل وبيشتغلوا عليه.
واستطرد: كان ممكن نصور فوق الـ 12 ساعة في مشهد واحد لأن المخرج عايز يوصل لحاجة معينة ومش هيسبني غير لما يوصلها، الحقيقة هو له يد كبيرة في ظهور الشخصية اللي عجبت الجمهور، والشخصية مستفزة وجميلة والحمد لله إني قدرت أقدمها بالشكل اللي عجب الناس ده.
