ترزي يطلب 1085 جنيها لتعديل جاكيت طفل.. وصاحب الواقعة: البليزر كله بـ600.. والمبرر إن عندهم تكييف وبروفة
أثار منشور الجدل على مواقع التواصل الاجتماعي، حيث يتضمن أن هناك محلا شهيرا طلب 1085 جنيها لتقصير أكمام جاكيت طفل صغير يبلغ من العمر 8 سنوات.
ترزي يطلب 1085 جنيها لتقصير بليزر
يقول صاحب التجربة والد الطفل في المنشور: تجربتي مع المحل ده صادمة، الناس دي بتسعر أسعار من الخيال ومفكرين نفسهم من عالم آخر، ويقولك السيستم بيقول، انتوا يا جماعة ترزي مش ديزاينر.
وأضاف صاحب المنشور: امبارح روحت ببلايزر بتاع ابني 8 سنين، عاوز أقصر الكم 2 سم، تخيل يقولي الحساب كام عشان أستلم بليل في نفس اليوم؟.. عاوز ياخد 1085، أيوه ألف وخمسة وثمانون جنيها، والبليزر نفسه كله على بعضه بـ 600 جنيه.
وتابع: تقصير البنطلون عندهم بـ 280 جنيها وتستلم في خلال 72 ساعة، والأستاذة اللي هناك تقولي دي أسعار السيستم، أظن الموظف ده مرتبه كله من التقصير بتاع البليزر.
صاحب الواقعة يروي التفاصيل
في هذا السياق، تواصل القاهرة 24 مع نور الدين سعيد، صاحب البوست الذي أكد صحته، مشيرا إلى أنه خرج بدون ما يجري أي تعديل في البليرز: أنا سمعت السعر ومشيت، يعني مدفعتش وادبست زي ما ناس كتير فاكرة، هما قالوا لي السعر وأنا اعترضت ومشيت.
وأضاف أنه المحل تواصل معه بعد المنشور، قائلا: كلموني بعد البوست بيحاولوا يبرروا السعر أن عندهم خدمات زي التكييف والبروفة.. طب ما كل المحلات عندهم بروفة، هل الناس بتقيس في الشارع.
وأكمل: عاوزيني أعدل البوست وأقول إن تعامهم وخدماتهم حلوة، مش فاهم إزاي وأنا يا دوب سمعت السعر ومشيت، وأنا غرضي من البوست ليس التشهير، ولكن من كثرة اندهاشي من الاستخفاف بعقول الناس والتسعير المبالغ فيه.
