في الذكرى الأولى لوفاته.. تسريب يكشف تهديد الإخوان للمشير طنطاوي قبل نتيجة الانتخابات الرئاسية 2012 | فيديو
تحل اليوم 21 سبتمبر الذكرى الأولى لوفاة المشير محمد حسين طنطاوي، القائد العام الأسبق للقوات المسلحة المصرية، وأحد أبرز وزراء الدفاع الذين مروا على التاريخ المصري منذ تأسيس الجيش المصري، ويعتبر صاحب أطول مدة بين وزراء الدفاع.
في شهر رمضان الماضي عرض مسلسل الاختيار تسريبا لمقطع فيديو، يجمع المشير طنطاوي واللواء عبد الفتاح السيسي وقتها، مع محمد مرسي مرشح جماعة الإخوان الإرهابية لانتخابات الرئاسة وقتها، حيث كشف التسريب عن تهديدات من جماعة الإخوان في حال خسارة الانتخابات وفيما يلي نص التسريب:
المشير: أباركلك على إيه، هي النتيجة طلعت؟
اللواء عبد الفتاح السيسي: إن شاء الله يوم الخميس الجاي يا فندم.
المشير: آه، طب عايزين بقى نرتب للفترة بعد إعلان النتيجة، دا في حالة يعني لو نجحت في الانتخابات.
الدكتور محمد مرسي: على بركة الله.
وبالانتقال لفيديو اللقاء التوثيقي كان الحديث كالتالي:
المشير: هو المفروض ميكونش موجود عشان تبقى دي بيني وبينك.
مرسي: لا لا
المشير: إنما لأ هو.. أصل دا يعني مش ابني.
مرسي: أنا عارف العلاقة دي إلى أي مدى هي.. إحنا عارفين الثقة.
المشير: وبعدين ده على فكرة يعني قربه من الله وإخلاصه لله الحمد لله.
اللواء السيسي: الحمد لله يا رب أكون كدة.
مرسي: سيادة اللواء عبد الفتاح السيسي شخصية الحقيقة إحنا يعني بنعتبره من الأسس اللي مع حضرتك، الذراع الأساسية يعني مش هنقول دراع يمين لكن الأدوية كتير.
المشير: ده من زمان، يعني أنا حاطط عيني عليه وهو لِسَّه مقدم.
مرسي: واضح.
اللواء السيسي: وسيادتك برضو يافندم، كان سيادتك مشير برضو.
مرسي: النتيجة متتغيرش لأن دي إذا حصلت ليس لها من دون الله كاشفة، الموجة اللي موجودة موجة إضرام نيران لمن لا يقدر المسئولية، أنا لا أتمنى هذا ولا أريده ولا أوافق عليه.
المشير: عايزك تاخد بالك من إن لو حصل وإن جهة ما حاولت أنها تضرم النار في البلد دي هتبقى مصيبة على البلد وعلينا.
مرسي: أيوة صحيح، عشان كدا أنا بتكلم.
المشير: عايزك تاخد بالك وخليهم مفيش داعي للحاجات دي.
مرسي: أنا بس أنا بقول لحضرتك إنه التصرف اللي موجود، الشعور اللي موجود شعور تلقائي شعبي وليس مخطط له.
المشير: لا في تخطيط معلش.
مرسي: النقطة التانية هو انعقاد مجلس الشعب.
المشير: انعقاد مجلس الشعب أنا مقدرش أعمل فيه حاجة، معلش أنا أصارحك الأول.. انعقاد مجلس، هل أنا أقدر حاجة دلوقتي في مجلس الشعب.
مرسي: آه حضرتك تقدر.
المشير: أعمل إيه.
مرسي: تلغي القرار.
المشير: لا أنا مقدرش ألغي القرار.
مرسي: ليه.
المشير: مع احترامي ليس من سلطتي إني ألغي القرار.
مرسي: لا هو حضرتك اللي أصدرت القرار.
المشير: مش أنا اللي أصدرت القرار، القرار ده قرار محكمة.
مرسي: القرار التنفيذي.
المشير: لا ده حكم محكمة.
المشير: لا ده التنفيذ دا حاجة والقرار حاجة، معلش أنا برضو بصارحك.
مرسي: استمع إلي بس.
المشير: أنا استمعت إليك والله كتير جدًا.
مرسي: أنا أخوك الصغير.
المشير: الموضوع ده أنا غير قادر عليه.
مرسي: بس اسمعني علشان متجيش في يوم من الأيام بعد يومين تلاتة أربعة نقول إنه إحنا ضيعنا فرصة.
المشير: أمال أعمل إيه، هو أنا هطلع قرار أعمل إيه هتلغي حكم المحكمة؟
مرسي: لا.
المشير: أنا مقدرش أعمل كدا معلش مع احترامي.
مرسي: حكم المحكمة هيطلع يا سيادة المشير.
المشير: أنا بقول لحضرتك إيه...
مرسي: ولكن هيطلع بطريقة يتفق عليها في مرحلة لاحقة.
المشير: يعني إيه.
مرسي: يعني بقول لحضرتك إحنا لو.. أنا اقترحت اقتراح واضح، إحنا قدامنا منفذ اتنين تلاتة، المنفذ الأولاني يتلغي القرار ودي مسألة مش صعبة، الحاجة التانية إن الموضوع يحال إلى الفتوى والتشريع.
المشير: يا محمد بيه أنا في اعتقادي مش أنا بس وأنا لو جمعت دلوقتي المجلس وعرضت عليهم مفيش حد هيوافق على الكلام ده، الموضوع ده مش متفق معلش.
مرسي: إذا استشعر الناس زي ما أنا بقول إنه سدت كل المنافذ.
المشير: ناس مين.
مرسي: الشعب اللي إحنا عايشين معاهم.
المشير: ما الشعب انتوا برضو متاخدوش الفئة من الشعب اللي هي..، ما تشوف الشعب كله بيقول إيه؟
مرسي: ما إحنا شايفين والله.
المشير: اسمع كلامي، لا معظم الشعب بيقول كلام تاني خالص.
مرسي: إحنا شايفين.
المشير: معظم الشعب بيقول كلام تاني خالص.
مرسي: النتيجة إذا تغيرت يا سيادة المشير.
المشير: مين اللي قال إنها هتتغير.
مرسي: سيؤدي هذا أنا بقول لحضرتك إلى حالة من الاضطراب لا نعرف إلى أي مدى ستذهب؟
تغيير النتيجة سيؤدي إلى اضطرابات ساعتها ولا أنا ولا أنتم هتقدروا تمنعوها ستتوجه الاضطرابات إلينا، ستمثل خطرا حقيقيا غير 11 فبراير، أنا أرصد الواقع لحضرتك، أنا لك ناصح أمين.
