سميحة أيوب: الدراما غلبانة ودلوقتي لاقينا ليها أب
تحدثت الفنانة سميحة أيوب، عن مهرجان القاهرة للدراما، معربة عن سعادتها الكبيرة بتكريم المهرجان لعدد من صُناع الدراما لعام 2022، مشيدة بتعاون القائمين على المهرجان مع نقابة المهن التمثيلية.
وقالت سميحة أيوب، خلال لقائها مع DMC، على هامش فعاليات حفل افتتاح المهرجان: أنا سعيدة جدًا ومكنتش أتخيل أن المهرجان يكون بالعظمة دي ومهما كنت أتخيل مكنش الواقع ده، فأنا سعيدة جدًا إن النقابة عاملة المهرجان ده والمتحدة محتضناه لأننا فقدنا مهرجان التليفزيون متوقف بقاله كتير، والدراما غلبانة وملهاش أب ودلوقتي لاقينا ليها أب.
وتابعت: التكريم في المهرجان ده له طعم تاني خالص ومذاق آخر، غير المهرجانات اللي بتتعمل علشان الناس تدخل فيها ويحتفلوا بيهم، لكن كون الدولة تعمل ده والنقابة تبادر بهذا فأنا سعيدة جدًا، المهرجانات دي بتعمل نوع من المنافسة الشريفة، كل واحد عايز يبقى أحسن، ده بيمهد الطريق للمواهب إنها تفكر زي زمان، وهيتعبوا بالساعات علشان يتفوقوا وده شيء هايل.
كما كشفت الفنانة سميحة أيوب، عن أصعب أعمالها الفنية قائلة: مفيش مشهد يتنسي، كل مشهد عايز تديله حقه، المسرحية اللي كنت خايفة وتعبت فيها هي مسرحية فدرة، وخوفت لما روحت باريس وعرضنا هناك، وفرقة مسرحية بتاعت الدولة بتعمل مسرحية لـ راسين، وراسين ده من كلاسيكيات فرنسا، يعني إحنا في عقر دارهم وبنعمل شغلهم، فكانوا مش متخيلين إننا هنكون كده.
وأضافت: أي فرقة وافدة لـ باريس بتعرض ليلة أو ليلتين، لكن إحنا عرضنا 15 يوما، وجالنا جوابات نقد ذاتي، إن ناس بيقولوا إنهم غلطانين إنهم قالوا إن عندنا جرأة نعمل راسين واللغة العربية دي عاملة زي الأوبرا.
مهرجان القاهرة للدراما
ويشهد حفل افتتاح مهرجان القاهرة للدراما، توزيع العديد من الجوائز على صناع دراما رمضان 2022، في عدة فئات، منها أفضل مسلسل وأفضل ممثل وممثلة وأفضل مخرج ومؤلف وأفضل موسيقى تصويرية وأفضل عمل كوميدي.
