عفاف شعيب: واحدة عملتلي سحر بسبب زوجي.. ورياض العريان رفض يسلفني فلوس أشتري عربية
كشفت الفنانة عفاف شعيب تفاصيل تعرضها للسحر لأول مرة، بجانب الحديث عن زوجها رجل الأعمال رياض العريان وبدايتها الفنية في مسلسل قيس ولبنى.
واحدة عملتلي سحر والعربية اتقلبت بيها
وقالت عفاف شعيب في تصريحات تليفزيونية: واحدة عملتلي سحر عشان جوزي يسيبني وتخطفه مني، ولكن أنا قولت يارب إنت وكيلي وبالفعل العربية اتقلبت بيها وعايشة طول عمرها عاجزة لأن عمري ما دعيت ربنا إلا وجابلي حقي، وأنا انفصلت عن زوجي ساعتها لأن العقد بيني وبينه انتهى خلاص.. زي المسلسل العقد بينتهي بعد ما بيخلص.
وأضافت عفاف شعيب: عمري ما أخدت فلوس من زوجي رياض العريان زي ما الناس بتقول إني تزوجته عشان الفلوس.. بالعكس مرة كنت عايزة أشتري عربية مرسيدس سنة 1988 ومكنش فيه تقسيط والمبلغ كان كبير ويصل لـ 45 ألف جنيه، وطلبت أستلف منه الفلوس ورفض وقالي عربيتك حلوة مش محتاجة تغيريها.. وربنا بعتلي شغل والحمدلله جبت العربية من فلوسي.
وتطرقت عفاف شعيب للحديث عن بداياتها في مجال التمثيل، قائلة: حصلت لي مواقف غيرة كتير من بعض الفنانات وخصوصا في بدايتي الفنية، بعد ما كنت هشارك في مسلسل لبنى وقيس بدور ثانوي جه محمود المليجي وقال" دي تعمل دور لبنى.. إنتوا معاكوا صاروخ" وبالفعل جسدت شخصية لبنى في المسلسل وحققت نجاح كبير.
وأضافت عفاف شعيب: بعض الأشخاص طلّعوا عليا شائعات وقالوا إن أدائي سيئ ووشي مش حلو على الشاشة.. ولكني مش بهتم بالغيرة وأي كلام سلبي ومش مهتمة أعرف مين قال كدا بالتحديد، ولكن لو شخص عزيز عليا وقال عني كلام سيئ هقطع علاقتي به فورا.
