نشوى مصطفى: الفنانة ثريا إبراهيم قالت لـ هشام سليم نفسي أحج.. تاني يوم حجز لها وسفَّرها
روت الفنانة نشوى مصطفى موقفًا إنسانيًا جمعها مع الفنان الراحل هشام سليم، الذي رحل عن عالمنا أمس عن عمر ناهز الـ 68 عامًا، بعد صراع دام لفترة طويلة مع مرض السرطان.
موقف إنساني لـ هشام سليم
وكتبت نشوى مصطفى منشورًا تروى فيه موقفا إنسانيا جمعها بكل من شريهان والفنان هشام سليم، وذلك من خلال حسابها الشخصي بموقع التواصل الاجتماعي فيس بوك، إذ قالت: افتكرت حاجة عن هشام سليم يمكن مش كتير يعرفوها، في يوم راجعة من التصوير، وكان فيها أستاذة ممثلة كبيرة الله يرحمها اسمها ثريا إبراهيم، قالت لي نشوى معنديش عربية توصليني في طريقك لأقرب مكان انزل أخد تاكسى —قلت لها تاكسي ازاي هوصل حضرتك لباب البيت.
وتابعت: واحنا ماشيين قالت لي عارفة الشقة اللي حتوصلينى ليها دي مين جابهالي، قلت لها مين، قالت لي شيريهان، وحكت لي إنها كانت بتشتغل معاها مسرحية شارع محمد علي وكانت بتيجي كل يوم من طنطا للقاهرة، وترجع تاني لأن بيتها كان هناك، ولما شريهان عرفت قالت لها شوفي الشقة اللي تحبيها وأنا اشتريهالك، ولما اشترتها كانت فرحانة.
نشوى مصطفى: هشام سليم دفع 50 ألف تكلفة حج ثريا إبراهيم
واختتمت نشوى مصطفى: هشام سليم عرف بارك لها وقال لها فرشتيها، ولا لسه قالت له فرشتها قال لها كان نفسى افرشهالك قالت له، وهى بتهزر طيب ما تعمل حاجة تانية قال لها تحت أمرك، قالت له نفسى أحج.. تاني يوم لقت شركة سياحة بتكلمها، وبلغتها إن هشام دفع كامل التكلفة وكانت خمسين ألف جنيه وكمان وهى رايحة عطاها مصروف الرحلة وقال لها: ادعى لي بس كده.. ألف رحمة ونور.
