أحمد برادة: ما بقتش عارف يعني إيه حب ومش هتجوز تاني
تحدث الفنان وبطل الاسكواش العالمي أحمد برادة، عن الحب في حياته، مشيرًا إلى أنه قرر ألا يتزوج مرة ثانية ويعيش لابنتيه فقط، وأن الحب أصبح بالنسبة له هو النجاح.
برادة: عايش لوحدي أنا وبناتي وأمي
وقال أحمد برادة خلال لقاء تلفزيوني: عايش لوحدي أنا وبناتي وأمي وربنا كرمني ببنتين هما أعظم بنتين بالنسبة لي وحياتي كلها ليهم ومبسوط وأنا معاهم وبكون مضايق لما يروحوا النادي، وهما الحمد لله متربيين كويس.
وأضاف: مش هتجوز تاني.. ربنا عمل لي كل حاجة ومش عاوز أكتر من كده.. مش عارف يعني إيه حب وما بقتش عاوزه ومش بفهمه خلاص، موضوع الحب قفلته من5 سنين وخلصت المواضيع ما عنديش حد تاني في حياتي.. ما عنديش وقت.. ربنا بياخد من حتة ويدي من حتة تانية كتير جدًا فوق ما تتصوري، وحبي بقى للشغل والنجاح ونفسي ربنا يقف جمبي أني أعمل حاجة كويسة لبلدي.
برادة: لو جالي عرض بـ 100 مليون جنيه زي رمضان صبحي هسيب الأهلي
كما تطرق برادة للحديث عن النادي الأهلي قائلًا: لو جالي عرض بـ 100 مليون جنيه زي رمضان صبحي، هوافق وهسيب الأهلي، حبي للأهلي هيفضل وطول عمري بحب الأهلي، بس لو كانوا وصلوا لـ رمضان صبحي جزء صغير في الفرق ما بين العقد ده والعقد ده كان هيكمل في الأهلي، الإعلام الرياضي لازم يتحسن، بيدوشوا الناس بحاجات ملهاش لازمة.
وصرح بطل الاسكواش العالمي بأنه أحب المزيكا لكنه لم يجد نفسه مع التمثيل، مضيفًا: أنا بحب السرعة والإنجاز لكن إني أعيد مشهدا صعبا بالنسبة لي علشان كده مالقتش نفسي في التمثيل.
ولفت إلى أن ليلى علوي هي من رشحته للمشاركة في فيلم حب البنات وأن أحمد عز كان صديقًا مقربًا له، مضيفًا: الفيلم كان مقبولا ولذيذا وتجربة ربنا وفقني فيها، ومش عارف ليه الناس حبت أغنية نسيني وأنا جنبك، وبزعل أن الناس بتفتكرني بحب البنات مش بالاسكواش.
